मालपोत कार्यालय बुटवलले सोमबारदेखि बुटवल १३ झोलुंगे पुल नजिक नयाँ कार्यालय स्थापना गरेर सेवा शुभारम्भ गरेको छ ।
यसअघि बुटवल सुखानगरबाट सेवा दिदै आएकोमा सेवाग्राहीको सुविधाका लागि मालपोत कार्यालय र नापी कार्यालय नजिक हुनुपर्ने नेपाल सरकारको सुशासनप्रतिको प्रतिवद्धता अनुसार मालपोत कार्यालयले सोमबारदेखि बुटवल १३ झोलुंगे पुल नजिक कार्यालय स्थापना गरेर सेवा शुभारम्भ गरेको हो ।

सेवा शुभारम्भ कार्यक्रमको अवसरमा धारणा राख्दै बुटवल उपमहानगरपालिकाका प्रमुख खेलराज पाण्डेयले विकासको चरणले धेरै परिवर्तन आएको बताउँदै नापी र मालपोत कार्यालय बेलबास आउनु सामान्य कुरा होइन भन्नुभयो । उहाँले भैरहवा नापी, मालपोत र जिल्ला प्रशासन कार्यालय भएरै चलेको बताउँदै अव बेलबास तामनगर क्षेत्र अझै गुल्जार हुने बताउनु भयो । उहाँले बेलबासमा आएको मालपोत कार्यालयलाई संरक्षित गर्न स्थानीय बासिन्दाहरुसंग आग्रह गर्नुभयो ।

कार्यक्रममा स्वागत गर्दै मालपोत कार्यालय बुटवलका प्रमुख दामोदर भण्डारीले जनतालाई दिने सेवामा कहीकतै विना अवरोध नियम र कानुनको परिधिमा रहेर सेवा प्रवाह गर्ने बताउँदै जनतालाई कसरी छिटो छरितो सेवा प्रवाह गर्न सकिन्छ भन्ने बिषयमा मालपोत कार्यालय हरदम हरसमय प्रतिवद्ध रहेको उल्लेख गर्नुभयो ।

रुपन्देहीका प्रम्ुख जिल्ला अधिकारी गणेश अर्यालको अध्यक्षतामा भएको कार्यक्रममा स्थानीय बुद्धिजीवी ऋषि आजाद लगायतले बोल्दै बेलबासमा आएको मालपोत कार्यालयको सेवाबाट स्थानीय जनताले धेरै सुविधा पाउने विश्वास ब्यक्त गर्नुभयो ।