रातिमा सुरु भएर रातिमै सकिने भडछा महोत्सव मंगलवार रातीदेखि सुरु भएको छ । ११४ औं भड्छा महोत्सव तथा माघे औंसी रात्रीकालीन मेला मंगलवारदेखि विहिवारसम्म तीन दिनसम्म सञ्चालन हुने छ ।

मेलाको लुम्बिनी प्रदेशका भौतिक पूर्वाधार विकास मन्त्री भूमिश्वर ढकालले मंगलवार अबेर साँझ उदघाटन गर्नुभएको हो ।
रुपन्देही जिल्लाको सैनामैना नगरपालिका –८ भड्छामा लाग्ने मेला भड्छा गाउँ समाज सैनामैना –८ को आयोजनामा भैरहेको छ ।

सैनामैना नगरपालिका वडा नं. ८ का वडा अध्यक्ष तथा मेला मूल आयोजक समितिका संयोजक बुद्धिराम चौधरीले भड्छा महोत्सव तथा रात्री माघे आंैसी मेला विगतका बर्षजस्तै यस बर्ष पनि थारु समुदायको सांस्कृतिक पहिचान र स्थानीय कला संस्कृतिको जगेर्ना गर्ने उद्देश्यसहित सुरु गरिएको बताउनुभयो ।

परापूर्वकालदेखि चल्दैआएको मेलाको इतिहासको संरक्षण तथा सम्बद्र्धन गर्ने तथा थारु समुदायको बसोबास र पहिचानलाई जोगाई राख्न बर्सेनी भड्छा महोत्सव सञ्चालन गर्दैआएको अध्यक्ष चौधरीले बताउनुभयो ।
मेलामा थारु संस्कृति झल्किने पहिरन, पुरानो सामग्री, थारु समुदायको ऐतिहासिक बडका नाच, झुमरा नाच, थारु परिकारका स्टलहरु, वडास्तरीय झुमरा नाच प्रतियोगिता, विद्यालय स्तरीय लोकनृत्य प्रतियोगिता, खुला वडास्तरीय भलिबल प्रतियोगिता हुने आयोजकले जनाएको छ ।