२७ वैशाख, काठमाडौं । कर्णाली नदीमा दुई किशोर बेपत्ता भएपछि सशस्त्र प्रहरीले गोताखोर टोली परिचालन गरी खोजी कार्य तीव्र पारेको छ।

कालीकोट जिल्लाको पचालझरना गाउँपालिका–८ स्थित कर्णाली नदीमा नरहरी गाउँपालिका–१, कोटवारीका १६ वर्षीय बिराज विष्ट शुक्रबार नुहाउने क्रममा डुबेर बेपत्ता भएका छन्। उक्त घटनाबारे जानकारी प्राप्त भएलगत्तै सशस्त्र प्रहरी बल नेपाल आश्रित गुल्म, कालीकोटले उद्धारका लागि पहल गरेको थियो।

शनिबार सशस्त्र प्रहरी बल नेपाल नं. ६ महेश्वरी बाहिनी मुख्यालय, सुर्खेतबाट पाँच सदस्यीय गोताखोर टोली घटनास्थलमा खटाइएको सशस्त्र प्रहरी बलका सहायक प्रवक्ता डीएसपी शैलेन्द्र थापाले जानकारी दिए। गोताखोर टोली हाल घटनास्थलमा परिचालित भई खोजी कार्यमा संलग्न छ।

यता, दैलेखको चामुण्डा विन्द्रासैनी नगरपालिका–९ स्थित कर्णाली नदीमै अर्का १६ वर्षीय किशोर भुवन सार्की पनि शुक्रबारै डुबेर बेपत्ता भएका छन्। उनको खोजीका लागि सशस्त्र प्रहरी बल नेपाल जलविद्युत आयोजना सुरक्षा बेस डावबाट सुरक्षाकर्मी परिचालन गरिएको छ।

लगातारको वर्षाका कारण नदीमा पानीको बहाव बढेकाले खोजी कार्यमा कठिनाइ भए पनि सशस्त्र प्रहरी बलले हराएका दुबै किशोरको सकुशल उद्धारका लागि प्रयास जारी रहेको जनाएको छ।

स्थानीयवासी तथा परिवारजनले उद्धार कार्यमा सरकार तथा सुरक्षा निकायको थप सक्रियता माग गरेका छन्।