रुपन्देहीको कञ्चन गाउँपालिकाको आयोजनामा र नेपाल ब्यावसायिक कलाकार संघ रुपन्देहीको सहजीकरणमा कञ्चन १ को दानापुर तालमा शुक्रबारदेखि चित्रकला कार्यशाला सुरु भएको छ ।

दुई दिनसम्म चल्ने चित्रकला कार्यशालामा कञ्चन गाउँपालिकामा रहेका ऐतिहासिक, धार्मिक र पर्यटकीय क्षेत्रका सम्पदाहरुलाई २० जना रंगकर्मीहरुले क्यानभासमा उतार्ने जमर्को गरेका छन ।

चित्रकला कार्यशालाको उदघाटन गर्दै कञ्चन गाउँपालिकाका अध्यक्ष नवराज ढकालले कञ्चन गाउँपालिकाका लागि यो पहिलो प्रयास हो भन्दै आगामी दिनमा समेत यस प्रकारका कार्यशालाको माध्यमबाट कञ्चन गाउँपालिकामा रहेका ऐतिहासिक तथा धार्मिक सम्पदालाई क्यानभासमा उतार्ने बताउनुभयो ।

त्यसैगरी कार्यक्रममा कञ्चन गाउँपालिकाका प्रमुख प्रशासकीय अधिकृत माधव पोखरेलले चित्रकला कार्यशालामार्फत पालिकाभित्र रहेका ऐतिहासिक, धार्मिक तथा पर्यटकीय सम्पदाको प्रचार प्रसारमा सहयोग पुग्ने भन्दै ती सम्पदाहरु क्यानभासमार्फत कञ्चनको अमूल्य निधी बन्ने बताउनुभयो ।

शनिवारसम्म चल्ने चित्रकला कार्यशाला उदघाटन सत्रको अध्यक्षता कञ्चन गाउँपालिकाका अध्यक्ष नवराज ढकालले गर्नुभएको थियो भने संचालन प्रशासन प्रमुख गिरिराज अर्यालले गर्नुभएको थियो ।