नेवाः पूच पर्रोहा सैनामैनाले हरेक बर्ष जस्तै यो बर्षपनि परम्परागत कला संस्कृतिको संरक्षण गर्ने उद्देश्यले सैनामैना नगरपालिकाको मुर्गियामा शनिवार साँझ लाखे नाच र रोपाई जात्रा प्रदर्शन गरेको छ । जनै पूर्णिमाका दिन आयोजित लाखे नाचमा नेवारी बाजागाजा र सांस्कृतिक झाँकी प्रस्तुत गरिएको थियो ।

सैनामैना–४ स्थित लुम्बिनी गेट अगाडि भएको कार्यक्रममा स्थानीय सैनामैनावासीको बाक्लो उपस्थिति रहेको थियो । संस्थाले हरेक वर्ष जनैपूर्णिमाको अवसरमा यसरी नै लाखे नाच प्रस्तुत गर्दै आएको छ । यस वर्षको कार्यक्रमले पनि दर्शकहरूलाई सांस्कृतिक मनोरञ्जन प्रदान गरेको छ ।

लाखे नाच प्रदर्शन कार्यक्रममा सैनामैना नगरपालिकाका प्रमुख फणेन्द्र प्रसाद शर्माले लाखे नाच लगायतका सांस्कृतिक कार्यक्रमले संस्कृतिको संरक्षण गर्न सहयोग पुग्ने विश्वास ब्यक्त गर्नुभयो ।

उहाँले धर्म संस्कृति र रीति परम्परा भावी पुस्तालाई हस्तान्तरण गर्नुपर्नेमा जोड दिदै नेवारी समुदायको परम्परा र संस्कृतिलाई जीवन्त राख्न कार्यक्रमले सहयोग पु¥याउने धारणा राख्नुभयो ।

कार्यक्रममा सैनामैना–४ का वडा अध्यक्ष रामप्रसाद अधिकारीले नेवारी समुदायको लाखे नाचले संस्कृति संरक्षणमा विशेष सहयोग पुगेको बताउँदै खासगरी युवा पुस्ताले पुराना संस्कृति र परम्परालाई जीवन्त बनाउनु पर्नेमा जोड दिनुभयो ।
नेवाः पुचका सैनामैना पर्रोहाका अध्यक्ष देवी प्रसाद श्रेष्ठको अध्यक्षतामा भएको कार्यक्रम बाबुराम श्रेष्ठको स्वागत तथा लक्ष्मी श्रेष्ठ र खिम श्रेष्ठको संचालनमा सम्पन्न भएको थियो ।