२०८३ भदौ २७ गते

सल्यानको त्रिवेणी गाउँपालिका–५ सिम्कमा बोलेरो जिप दुर्घटना हुँदा तीन जनाको मृत्यु भएको छ भने तीन जना घाइते भएका छन्।

शनिबार बिहान सिम्कबाट लुहाम हुँदै दाङतर्फ जाँदै गरेको लु.प्र.०२–००१ ज ०००५ नम्बरको जिप अनियन्त्रित भई सडकबाट करिब ९० मिटर तल खसेको प्रहरीले जनाएको छ।

दुर्घटनामा त्रिवेणी–६ पोखरीका ८ वर्षीय रेशम बुढाथोकी, त्रिवेणी–५ सल्लेका करिब १८ वर्षीया विपना बुढाथोकी र ५० वर्षीय डिल्लीबहादुर वलीको मृत्यु भएको छ। रेशम र विपनाको घटनास्थलमै तथा डिल्लीबहादुरको उपचारका क्रममा दाङमा मृत्यु भएको हो।

घाइतेमध्ये चालक भुपाल पुनको अवस्था गम्भीर छ। अन्य घाइते पारस बोहरा र लालमति बुढाथोकीको अवस्था मध्यम रहेको प्रहरीले जनाएको छ। घाइते तीनै जनालाई प्रारम्भिक उपचारपछि थप उपचारका लागि दाङको घोराहीस्थित राप्ती स्वास्थ्य विज्ञान प्रतिष्ठान पठाइएको छ।