राष्ट्रिय परोपकार महासंघ नेपालले रूपन्देही जिल्ला कार्यसमितिको तत्वावधानमा परोपकार कुञ्ज धाम निर्माण गर्ने उद्देश्यले आयोजना गरेको महायज्ञमा दाताहरूको उपस्थितिले आयोजक उत्साहित भएका छन ।

२०६४ सालमा स्थापना भएको संस्था राष्ट्रिय परोपकार महासंघ नेपालले देशका विभिन्न जिल्लाहरूमा आफ्ना अभियानहरू सञ्चालन गर्दै आइरहेको छ ।

सोही अभियान अन्तर्गत राष्ट्रिय परोपकार महासंघ नेपाल रूपन्देही जिल्ला कार्यसमितिको तत्वावधानमा रूपन्देही जिल्ला बुटवल–१५ स्थित भाटाप्रगती टोलमा करीब ४ विगाह क्षेत्रफलमा विस्तार हुने गरी परोपकार कुञ्जधामको निर्माण योजना अगाडि बढिरहेको छ ।

धामलाई सेवाकेन्द्रको साथै पर्यटकीय गन्तव्यको रूपमा समेत विस्तार गर्ने वृहत् लक्ष्य संघले राखिएको छ । त्यही लक्ष्यलाई साकार पार्नको लागि फागुन ४ गतेदेखि ११ गतेसम्म राष्ट्रिय परोपकार महासंघ नेपालका परिकल्पनाकार तथा अध्यक्ष भागवत भाष्कर कमलनयन गौतमले महायज्ञको आयोजना गर्नुभएको हो ।