सैनामैना, १६ पुस । नेकपा (एमाले) का नेता बासुदेव घिमिरेले पार्टी परित्याग गर्नुभएको छ । मंगलबार राती सामाजिक सञ्जाल फेसबुकमा स्टाटस लेख्दै घिमिरेले आफू संलग्न पार्टीको जिम्मेवारीदेखि अलग रहेको घोषणा गर्नुभएको छ ।

पुराना राजनीतिक दलहरुको मुख्य नेतृत्वले मुलुकको आम जनताको इच्छा र चाहनालाई सम्बोधन गर्ने अवस्था नदेखिएकोले पार्टीको जिम्मेवारीदेखि अलग भएको बताउनुभयो ।

‘अहिले आम जनताको चाहना सुशासन, विकास, समृद्धिका साथै नेतृत्व हस्तान्तरण, पुस्तान्तरण र रुपान्तरण पनि हो । देशको आवश्यकता, इतिहासको गति र आम नागरिकको अपेक्षालाई सम्बोधन गर्नु अहिलेको मुख्य कार्यभार हो, ’उहाँले भन्नुभयो ।

देशप्रतिको अविचलित निष्ठा ,सुशासन, विकास र समृद्धि राजनीतिको अनिवार्य शर्त भएको उहाँको भनाइ छ । ‘सुशासन, विकास, रोजगारीका साथ मुलुकलाई समृद्धिको यात्रामा अघि बढाउने अभियानमा ईमान र निष्ठाका साथ सदैव यहाँहरु सबैसँग सँगसँगै रहनेछु, ’घिमिरेले भन्नुभयो ।

घिमिरे २०७४ सालमा नेपाली काँग्रेसका उम्मेदवार रामकृष्ण खाणलाई पराजित गर्दै रुपन्देहीको तिलोत्तमा नगरपालिकाको प्रमुखमा निर्वाचित हुनुभएको थियो । त्यस्तै २०७९ सालमा काँग्रेसका भरत कुमार शाहलाई पराजित गर्दै रुपन्देही क्षेत्र नम्बर ५ बाट प्रतिनिधि सभा सदस्यमा निर्वाचित हुनुभएको थियो । पार्टीको लुम्बिनी प्रदेश कमिटीको अधिवेशनबाट प्रदेश सदस्यमा निर्वाचित घिमिरे हालै सम्पन्न ११ औं महाधिवेशनमा भने केन्द्रीय सदस्यमा पराजित हुनुभएको थियो ।