नेपाल जेसिजको ५० औं राष्ट्रिय महाधिवेशन यही मंसिर अन्तिम साता बुटवलमा हुने भएको छ ।
बुटवल जेसिजले आफ्नो स्वर्ण जयन्तीको अवसरमा मंसिर २९ देखि पुस २ गतेसम्म जेसिजको ५० औं महाधिवेशन आयोजना गर्ने भएको हो ।
बुटवल जेसिजले सोमवार पत्रकार सम्मेलनमार्फत् महाधिवेशनमा देशभरबाट २ हजार ५०० प्रतिनिधि सहभागी हुने जानकारी दिएको छ ।
रामनगरस्थित अन्तर्राष्ट्रिय सम्मेलन केन्द्रमा हुने महाधिवेशनको तयारी तीव्र पारिएको जेसिजले जनाएको छ ।
नेपाल जेसीजका पूर्व अध्यक्ष तथा महाधिवेशन निर्देशक जगतबहादुर पोखरेलले महाधिवेशन सम्पन्न गर्नका लागि करिब २ करोड ६५ लाख ५० हजार रुपैयाँ खर्च लाग्ने अनुमान गरिएको बताए ।
पोखरेलले बुटवल जेसीजको ५० औँ वर्षको अवसरमा राष्ट्रिय जेसिजको महाधिवेशन गर्न पाउनु बुटवलका लागि धेरै नै गर्वको कुरा भएको बताए ।
बुटवल जेसीजले यस भन्दा पहिला दुई वटा राष्ट्रिय महाधिवेशन सफलतापूर्वक सम्पन्न गरिसकेको र यस पटकको महाधिवेशन पनि भव्यताका रुपमा नै सम्पन्न हुने महाधिवेशन निर्देशक पोखरेलले बताए ।
नेपाल जेसिजका पूर्वअध्यक्ष अनुपमान शैजुले यस महाधिवेशनले बुटवलको आर्थिक गतिविधिलाई चलायमान गराउनका लागि धेरै टेवा पुर्याउने बताए । बुटवल जेसीजका अध्यक्ष हरि विक्रम कुँवरले पनि बुटवल जेसिजको स्वर्णजयन्तीको अवसरमा ५० औं राष्ट्रिय महाधिवेशन गर्न पाउनु ठूलो अवसर भएको बताउँदै यसले बुटवलको पर्यटन प्रर्वद्धनमा पनि सहयोग पुर्याउने बताए ।
महाधिवेशनले वर्षभरिका गतिविधिहरूको रिपोर्टिङ तथा कार्ययोजना निर्माणसँगै नयाँ नेतृत्व चयन गर्ने महाधिवेशन सचिव सिनेटर मनोज भट्टराईले बताए ।
साथै महाधिवेशनको अवसरमा बुटवलको मुख्य भाग परिसरमा शान्ति पदयात्रा प्रभातफेरी गरिनेछ ।
महाधिवेशनलाई सफल बनाउन सन् २००७ पछिका १५ जना पूर्व अध्यक्षहरू गठित समितिको संयोजक १२ जना पदाधिकारी सह संयोजक र ८० जना सदस्यहरू विभिन्न उपसमितिमा, वर्ष २००७ भन्दा अघिका १२ जना पूर्वअध्यक्षहरूको सल्लाहकार समिति र ३ सदस्यीय विशेष प्रमुख सल्लाहकार गठन गरिएको छ ।
प्रतिक्रिया
सम्बन्धित खवर
