तनहुँको देवघाट गाउँपालिकाले सोमबार सार्वजानिक बिदा दिएको छ।
बालाचतुर्दशीका दिन विभिन्न स्थानबाट हजारौं तीर्थयात्री भक्तजन देवघाटधाममा शतवीज छर्न आउने हुँदा सार्वजनिक बिदा दिइएको गाउँपालिकाले आईतबार जारी गरेको सूचनामा उल्लेख गरिएको छ।

देवघाट क्षेत्रभित्रका सरकारी कार्यालय (अत्यावश्य सेवा बाहेक), सार्वजनिक सङ्घ संस्था एवं शिक्षण संस्थामा सार्वजनिक बिदा दिइएको गाउँपालिकाका प्रमुख प्रशासकीय अधिकृत गौरीप्रसाद आचार्यले जानकारी दिनुभयो।
गाउँ कार्यपालिकाले मङ्सिर १० गते नै बिदा दिने निर्णय गरेबमोजिम सोमबार बिदा दिइएको उहाँले जानकारी दिनुभयो।

बालाचतुर्दशीमा देवघाटमा नेपालका विभिन्न जिल्लाका साथै भारतबाट पनि भक्तजन आउने गर्दछन्।

यसैगरी म्याग्दीको बेनी नगरपालिका–९, स्थित ऐतिहासिक धार्मिक स्थल गलेश्वरधाममा लाग्ने बालाचतुर्दशी मेलाको तयारी पूरा भएको छ।

पश्चिमको पशुपतिनाथको रूपमा परिचित गलेश्वरमा लाग्ने यस वर्षको बालाचतुर्दशी मेलाको तयारी पूरा भएको गलेश्वर शिवालय क्षेत्र विकास कोषले जनाएको छ।
मेलालाई सुरक्षित र व्यवस्थित बनाउन विभिन्न २९ वटा उपसमिति गठन गरेर तयारी पूरा गरेको कोषका सदस्यसचिव बलबहादुर खत्रीले जानकारी दिनुभयो।

उहाँका अनुसार, पर्वको अवसरमा हुने शतबीज छर्ने मेलालाई व्यवस्थित बनाउन कोषका अध्यक्ष माधवप्रसाद रेग्मीको अध्यक्षतामा मूल र अन्य उपसमिति गठन गरिएको हो। यस वर्षको बालाचतुर्दशी मङ्सिर २५ गते सोमबार परेको छ।