रुपन्देहीको गैडहवा गाउँपालिकामा पाँचौ राष्ट्रपति रनिङशिल्ड प्रतियोगिता २०८० सुरु भएको छ । प्रतियोगिताको विहिवार गैडहवा गाउँपालिकाका अध्यक्ष सुरेन्द्र पौडेलले एक समारोहका बीच उदघाटन गर्नुभयो ।

उदघाटन मन्तब्य ब्यक्त गर्दै गैडहवा गाउँपालिकाका अध्यक्ष सुरेन्द्र पौडेलले राष्ट्रपति रनिङशिल्ड प्रतियोगिता गैडहवा गाउँपालिकाको लागि गौरव भएको उल्लेख गर्दै प्रतियोगितामा भाग लिने खेलाडी विद्यार्थी भाई बहिनीहरुलाई सफलताको शुभकामना दिनुभयो ।

उहाँले गैडहवाका विभिन्न स्थानमा खेल मैदान बनाउन पालिकाले अध्ययन सुरु गरेको बताउँदै गैडहवालाई खेलकुद क्षेत्रको हव बनाउन कुनै कमी हुन नदिने प्रतिवद्धता जनाउनु भयो ।

कार्यक्रममा गैडहवा गाउँपालिकाका पूर्व अध्यक्ष बच्चुलाल केवटले राष्ट्रपति रनिङशिल्ड प्रतियोगिता विद्यार्थी भाई बहिनीहरुका लागि शैक्षिक महोत्सव जस्तै रहेको बताउँदै विद्यार्थीहरुका लागि मात्र होइन गैडहवाकै लागि खुसीको क्षण रहेको उल्लेख गर्नुभयो । उहाँले प्रतियोगिताले खेलकुद क्षेत्रको विकासमात्र नभै विद्यार्थीहरुबीच परिचयका साथै खुसी साटासाट गर्ने माध्यम पनि बन्ने विश्वास ब्यक्त गर्नुभयो ।

कार्यक्रममा गैडहवा गाउँपालिकाका प्रमुख प्रशासकीय अधिकृत कृष्णपसाद पन्थी, स्थानीय राजनैतिक दलका प्रतिनिधिहरु, समाजसेवी, शिक्षा प्रेमी लगायतले बोल्दै राष्ट्रपति रनिङशिल्ड खेलकुद पालिकाकै गौरव भएको बताउनु भयो । चारदिनसम्म चल्ने प्रतियोगिता उदघाटनकै अवसरमा प्रतियोगितामा सहभागी विद्यार्थीहरुले मार्चपास समेत गरेका थिए ।