रुपन्देहीको ब्यापार व्यवसाय चलायमान बनाउन उद्योग ब्यापार संघ बुटवलले विभिन्न पेशागत र वस्तुगत व्यवसायिक संघसंस्थासंग सुझाव संकलन र अन्तरक्रिया गरेको छ । अन्तरक्रियामा व्यवसायिक संघ संस्थाका प्रमुखहरुले प्रदेश राजधानी बुटवलबाट दाङ सर्नु, कोराना महामारीको असर, आर्थिक मन्दी, चर्को बैंक ब्याज दर, महंगो घर भाडा, खुला सीमाबाट हुने तस्करी र भन्सार छली र युवा जनशक्तिको विदेश पलायन जस्ता कारणले रुपन्देहीको उद्योग,ब्यवसायमा संकट आएको बताए ।

रुपन्देहीको उद्योग व्यवसायलाई पुनः गुल्जार बनाउन व्यवसायिक संघ संस्थाहरु एकजुट भएर नीतिगत सुधारका लागि सरकारलाई दबाव दिनुपर्नेमा उनीहरुले जोड दिएका छन । कार्यक्रममा बोल्दै नेपाल उद्योग ब्यापार महासंघका केन्द्रीय महासचिव खिमनारायण पराजुलीले विगतका सरकारले स्वाधीन र आत्मनिर्भर अर्थतन्त्र तथा ब्यापार विविधिकरणमा ध्यान नदिंदा मुलुक परनिर्भरता र ब्यापार घाटाले थिलोथिलो भएको बताउनुभयो ।
उहाँले व्यवसायीको कारोबारको फूल अडिटको नाममा राजस्वका कर्मचारीलाई कमाई खाने भांडो भएकोले यसलाई नियन्त्रण गरिनुपर्ने बताउनुभयो ।

संघका सल्लाहकार ज्योति भण्डारीले प्रदेश राजधानी सरेको लगायत कारणले रुपन्देहीको ब्यापार व्यवसाय धरापमा परेको र अब व्यवसाय चलायमान बनाउन सरकारको मात्र मुख नताकी एकजुट भएर लाग्नुपर्ने बताउनुभयो ।

महासंघका केन्द्रीय सदस्य पुष्पराज ढकालले केन्द्रमा बस्ने ठूला व्यवसायीले साना मझौला व्यवसायीको पक्षमा नीति र ऐन कानुन बन्न नदिने परिपाटी रोक्न लाग्नुपर्ने सुझाव दिनुभयो । उद्योग ब्यापार संघ बुटवलका अध्यक्ष विष्णुप्रसाद पाण्डेले रुपन्देहीका विभिन्न थरिका पेशागत र वस्तुगत ब्यापार व्यवसायमा देखिएको नीतिगत समस्याको पहिचान र व्यवसाय चलायमान बनाउने उपायको खोजीगरी महासंघलाई सुझाव दिन अन्तरक्रिया गरिएको बताउनुभयो ।