सैनामैना नगरपालिका वडा नंं १० झिमझिमियामा रहेको प्याराडाईज इङलिश स्कुलको आयोजनामा शनिवार कुशल अभिभावकत्व निर्माणका लागि अभिभावक अभिमुखिकरण कार्यक्रम आयोजना गरेको छ ।
शिक्षक पेसागत दक्षता अभिवृद्धी कार्यक्रम अन्तरगत आयोजना गरिएको अभिमुखीकरण कार्यक्रममा प्रशिक्षकको भूमिका ऋषि न्यौपानेले गर्नुभएको थियो ।

विद्यालयका अध्यक्ष शान्तबहादुर पुनको अध्यक्षतामा भएको कार्यक्रममा बोल्दै कार्यक्रमका विशिष्ट अतिथी सैनामैना १० का वडा अध्यक्ष कृष्णप्रसाद घिमिरेले अभिभावक अभिमुखीकरण कार्यक्रम सवैका लागि अत्यन्त महत्वपूर्ण रहेकोले ध्यान दिएर कार्यक्रमको उपादेयता ग्रहण गर्न उपस्थित सवैसंग अनुरोध गर्नुभयो ।

कार्यक्रममा विद्यालयका लेखा समिती सदस्य टोपलाल अधिकारी, विद्यालय व्यवस्थापन समिति सदस्य विमला थापा लगायतले बोल्दै यस प्रकारका अभिमुखीकरण कार्यक्रमले पुनर्ताजगी प्रदान गर्नुका साथै उर्जा बढाउने उल्लेख गर्नुभयो ।

सामुदायिक भवनको सभाहल झिमझिमियामा भएको कार्यक्रममा कार्यक्रमको बिषयमा जानकारी एवम सहजीकरण विद्यालयका प्रिन्सिपल सौगात भट्टराईले दिनुभएको थियो भने स्वागत मन्तव्य शिक्षक भरत परियारले गर्नुभएको थियो । कार्यक्रममा करिब तीनसय अभिभावकको उपस्थिति रहेको थियो ।