लुम्बिनी प्रदेशका मुख्यमन्त्री चेतनारायण आचार्यले प्रदेशसभाबाट दुई तिहाई सांसदको समर्थन पाउनु भएको छ ।
मंगलबार बसेको प्रदेश सभाको बैठकमा मुख्यमन्त्री आचार्यले राखेको विश्वासको मतसम्बन्धी प्रस्तावको पक्षमा ७० मत परेको छ भने प्रस्तावको विपक्षमा जम्मा ११ मत परेको छ । प्रदेश सभामा ५ जना सांसद अनुपस्थित भए ।
८७ सदस्यीय प्रदेशसभामा मुख्यमन्त्रीले पाएको मत करिब दुई तिहाइ हो । नेकपा एमाले र नेपाली कांग्रेसको गठबन्धन बनेपछि गत साउन ७ गते आचार्य मुख्यमन्त्रीमा नियुक्त हुनुभएको थियो ।
मुख्यमन्त्रीलाई एमालेका २९, कांग्रेसका २७, नागरिक उन्मुक्तिका ४, लोसपा र जनमतका ३–३, जसपाका २, जसपा नेपालका एक र स्वतन्त्र एक गरी ७० प्रदेश सभा सदस्यले विश्वासको मत दिनुभएको हो ।
प्रदेश सभामा माओवादी केन्द्रका ११, राप्रपाका ४ तथा एकीकृत समाजवादी र जनमोर्चाका एक एक सांसद प्रतिपक्षमा छन् ।
मुख्यमन्त्री आचार्यले विश्वासको मत पाएपछि संचारकर्मीहरुसंगको कुराकानीमा केही दिनमै मन्त्रिपरिषदलाई पूर्णता दिने बताउनु भएको छ ।