विश्व शान्ति युवा क्लव सालझण्डी रुपन्देहीको आयोजनामा तिज विशेष सांस्कृतिक मेला २०८१ मंगलवारदेखि सालझण्डीमा सुरु भएको छ ।
पशुपति स्कुलको खेल मैदानमा सुरु भएको मेला भदौ ३० गतेसम्म संचालन हुनेछ । मेलाको मंगलबार साँझ सैनामैना नगरपालिकाका प्रमुख फणेन्द्रप्रसाद शर्माले एक समारोहका बीच उदघाटन गर्नुभयो ।
मेलाको उदघाटन गर्दै सैनामैना नगरपालिकाका प्रमुख फणेन्द्रप्रसाद शर्माले यस प्रकारका मेलाले तीजको मौलिकता संरक्षण गर्नेतर्फ ध्यान दिनुपर्ने बताउँदै विश्व शान्ति युवा क्लवले समाजमा रहेको विकृति र विसंगति अन्त्य गर्नेतर्फ पनि ध्यान दिनुपर्ने बताउनुभयो ।
उक्त मेलामा कलाकारहरु शिव परियार, रामजी खाँड, पशुपति शर्मा, खुमन अधिकारी, दुर्गेश थापा, प्रिती आले, रमेशराज भट्टराई, करण परियार, अर्जुन सापकोटा, कुशल बेलबासे, प्रकाश दुतराज लगायत स्थानीय कलाकारको समेत प्रस्तुती रहने आयोजक विश्व शान्ति युवा क्लवले जनाएको छ ।
तीज बिशेष सांस्कृतिक मेलाका आयोजक विश्व शान्ति युवा क्लव सालझण्डीका अध्यक्ष खडकबहादुर जिसीको अध्यक्षतामा भएको उदघाटन कार्यक्रममा सैनामैना नगरपालिका वडा नंं १० का वडा अध्यक्ष कृष्णप्रसाद घिमिरे, मुहान सहकारी संस्थाकी सचिव नन्दा बुढा र न्यू कञ्चन आमा समूहकी उपाध्यक्ष मिना श्रेष्ठ लगायतले बोल्नुभएको थियो ।