रुपन्देहीको सैनामैना नगरपालिका ६ मा रहेको जनकल्याण माध्यमिक विद्यालयको ४२ औं बार्षिकोत्सव तथा अभिभावक दिवस सम्पन्न भएको छ ।
बार्षिकोत्सव समारोहको ब्यानर पढेर र सरस्वतीको तस्बिरमा माल्यार्पण गरेर उदघाटन गर्दै सैनामैना नगरपालिकाका प्रमुख फणेन्द्रप्रसाद शर्माले जनकल्याण माध्यमिक विद्यालयले सैनामैनाकै शैक्षिक क्षेत्रमा अग्रणी भूमिका निर्वाह गर्दै आएको बताउँदै यहाँ पढेका जनशक्तिले देश विदेशमा नाम र ख्याती कमाएको बताउनुभयो ।

उहाँले जनकल्याण माध्यमिक विद्यालयले समयको माग र परिवर्तनलाई आत्मसाथ शैक्षिक गुणस्तरलाई पनि सोही अनुसार अघि बढाउनुपर्ने सुझाव दिनुभयो ।
विद्यालय व्यवस्थापन समितिका अध्यक्ष तथा सैनामैना नगरपालिका वडा नंं ६ का वडा अध्यक्ष गोपालप्रसाद पोखरेलको अध्यक्षतामा भएको बार्षिकोत्सवका अवसरमा विद्यालयका प्रधानाध्यापक अर्जुनप्रसाद पोखरेलले विद्यालयको प्रगति प्रतिवेदन प्रस्तुत गर्नुभएको थियो ।

कार्यक्रममा मानव अधिकार तथा शान्ति समाजका पूर्व अध्यक्ष गोविन्द खनाल, सैनामैना नगरपालिका ८ का वडा अध्यक्ष बुद्धिराम चौधरी लगायतले बोल्नुभएको थियो । बार्षिकोत्सव तथा अभिभावक दिवसको अवसरमा उत्कृष्ट विद्यार्थीलाई सम्मान तथा पुरस्कार वितरण गरिएको थियो ।