रुपन्देहीको सैनामैना नगरपालिका २ मा रहेको कालिका आधारभुत विद्यालयको गुणस्तरीय शिक्षा तथा अक्षयकोष स्थापनाका लागि श्रीमदभागवत महापुराण धनधान्याञ्चल ज्ञान महायज्ञ तथा श्रृंगारिक महाआरती बुधबारदेखि सुरु भएको छ ।

पुस १७ देखि २४ गतेसम्म हुने महायज्ञको शुभारम्भ सैनामैना नगरपालिकाका प्रमुख फणेन्द्रप्रसाद शर्माले एक समारोहका बीच गर्नुभयो ।

त्यस अवसरमा बोल्दै उहाँले महायज्ञको अत्यन्त ठूलो अर्थ र महत्व छ भन्दै भोलीको दिनमा कालिका आधारभूत विद्यालयमा संस्कार, संस्कृति, परम्परा र रीतिरिवाज सिक्ने विद्यार्थीको अध्ययन हुन्छ भन्ने कुराको बोध हुने र अरु विद्यार्थीपनि आएर पढ्छन भन्ने आफूले विश्वास लिएको बताउनुभयो । उहाँले विद्यालयका नगरपालिकाको तर्फबाट गर्नुपर्ने सहयोगको प्रतिवद्धता जनाउनु भयो ।

विद्यालय व्यवस्थापन समितिका अध्यक्ष तथा महायज्ञ मूल आयोजक समितिका अध्यक्ष नरेन्द्रप्रसाद शर्माले यो विद्यालयमा बिषयगत विज्ञ शिक्षकको व्यवस्था हुँदापनि विद्यार्थी भर्ना नहुने र पढ्न नआउनुको कारण अव खोजी गर्नुपर्ने बताउनुभयो ।

उहाँले विद्यार्थी नआउनुको कारण पत्ता लगाउन राजनैतिक दलहरुले छानविन समिति नै गठन गरेर यसको कारण खोजी गर्न आग्रह गर्नुभयो ।

महायज्ञ मूल समितिका महासचिव डिल्लीराज घिमिरेको संचालनमा महायज्ञ शुभारम्भ कार्यक्रम भएको हो । त्यस अवसरमा बुधबार नै कलशयात्रा समेत गरिएको थियो । महायज्ञको कथाबाचन पण्डित चन्द्रकान्त काफ्लेले गर्नुहुने भएको छ । महायज्ञ शुभारम्भका अवसरमा स्थानीय अभिभावक, विद्यार्थी लगायत विभिन्न राजनैतिक व्यक्तित्वहरुको सहभागिता रहेको थियो ।