रुपन्देहीको कञ्चन गाउँपालिकास्थित रुद्रपुर खानेपानी उपभोक्ता तथा सरसफाई संस्थाको आठौं वार्षिक साधारण सभा स्वस्थ खानेपानी सम्बन्धी मौलिक लोकगीत तथा नृत्य प्रतियोगिता सहित सम्पन्न भएको छ ।

सभामा संस्थाको तर्फबाट अध्यक्ष नामबहादुर के.सी.ले संस्थाको प्रतिवेदन, कोषाध्यक्ष निर्मला शर्माले आर्थिक प्रतिवेदन र लेखा समितिका संयोजक आमप्रसाद गुरुङ्गले लेखा प्रतिवेदन प्रस्तुत गर्नुभएको छ ।

साधारण सभाको अवसरमा संस्थाले स्वच्छ पानी पिऔं, निरोगी जीवन जिऔं भन्ने शिर्षकमा मौलिक लोकगीत तथा नृत्य प्रतियोगिता संचालन गरेको थियो । प्रतियोगितामा १० समूहले सहभागिता जनाएका थिए । बुद्धदीप ईङ्गलिस बोर्डिङ्ग स्कुल प्रथम, नारायणम भजन मण्डली द्वितीय र तृतीय सनमोडल ईङ्गलिस बोर्डिङ्ग स्कुल र सान्त्वना जनजागरण मण्डली भएका छन ।

साधारण सभाको उदघाटन गर्दै रुपन्देही क्षेत्र नं. ५ का सभासद बासुदेव घिमिरेले राज्य पुनः संरचना पश्चात निर्माण भएका स्थानीय तह नै जनताको नजिकको सरकार भनिएपनि अधिकार जति संघमा निहित भएका कारण स्थानीय तहहरुले खुलेर काम गर्न नपाएको बताउनुभयो ।

कार्यक्रममा कञ्चन गाउँपालिकाका अध्यक्ष नवराज ढकाल, उपाध्यक्ष मौसमी थापा मगर, खानेपानी डिभिजन कार्यालय बुटवलका खानेपानी महाशाखाका सचिव बासुदेव पौडेल, नेकपा माओवादी केन्द्रका पुष्पराज शर्मा, हरैया बहुमुखी क्याम्पसका टीकाराज गिरी, उपभोक्ताहरुको तर्फबाट कोपिला श्रेष्ठ लगायतले बोल्नु भएको थियो।

३ हजार भन्दा बढी उपभोक्ता भएको संस्थाको साधारण सभामा संस्थाका सचिव रेशम बहादुर थापाको संचालन तथा उपाध्यक्ष मदन पौडेलको स्वागत गर्नुभएको थियो ।