सैनामैना नगरपालिकाको आयोजनामा सैनामैना नगरपालिका ९ को पुरानो वडा कार्यालयमा सामुदायिक कुकुर नियन्त्रणको लागि आयोजना गरिएको तिन दिने खोप तथा बन्ध्याकरण शिबिर शुक्रबार सम्पन्न भएको छ ।

शिविरमा ३ सय ३ वटा भुस्याहा र सामुदायिक कुकुरलाई रेबिजविरुद्ध खोप तथा २ सय ६० वटा कुकुरको बन्ध्याकरण गरिएको थियो । सैनामैना नगरपालिकाले यसअघि गत बर्षपनि सैनामैनामा सामुदायिक कुकुरको बन्ध्याकरण तथा रेविजविरुद्ध खोप लगाएको थियो ।

बन्ध्याकरण तथा रेविजविरुद्ध खोपको बिषयमा जानकारी दिदै सैनामैना नगरपालिकाका प्रमुख फणेन्द्रप्रसाद शर्माले सैनामैनामा आयोजित यो अभियानबाट भुस्याहा कुकुर नियन्त्रण तथा सामुदायिक कुकुर बन्ध्याकरणमा सहयोग पुगेको बताउनुभयो ।केन्द्रिय रिफरल पशु चिकित्सालय त्रिपुरेश्वर काठमाण्डौंको सहकार्यमा बन्ध्याकरण तथा खोप शिबिर सम्पन्न भएको हो ।

विहान ७ बजेदेखि साँझ ६ बजेसम्म संचालन भएको शिबिरमा सामुदायमै गएर कुकुरलाई नियन्त्रणमा लिई बाँसगढीमा भएको शिविरमा बन्ध्याकरण तथा खोप लगाइएको सैनामैना नगरपालिकाका पशु विकास अधिकृत इन्द्रबहादुर खडकाले जानकारी दिनुभयो ।