रुपन्देहीको सैनामैना नगरपालिका वडा नः १ आदर्शपथस्थित सैनामैना मेमोरियल स्कुलमा बिहिबारदेखि खेलकुद सप्ताह सुरु भएको छ । राष्ट्रका लागि खेलकुद स्वास्थ्यका लागि खेलकुद भन्ने नाराका साथ आयोजित कार्यक्रमको उदघाटन विद्यालयका प्राचार्य डि. बि. खत्री, प्रवन्ध निर्देशक जे.बि. क्षेत्री, सहप्राचार्य पदम अर्याल तथा शैक्षिक सल्लाहकार लिलाधर घिमिरेद्वारा संयुक्त रुपमा गरिएको थियो ।

खेल सप्ताहको उदघाटनको क्रममा बोल्दै प्राचार्य डिबी खत्रीले विद्यार्थीहरुमा रहेको अन्तर्निहित प्रतिभा पहिचान तथा प्रस्फुटन गराउनको लागि यो खालको कार्यक्रम आयोजना गरिएको बताउनुभयो ।

खेलकुदका कार्यक्रमले विद्यार्थीहरुमा शारीरिक तथा मानसिक पक्षको मात्र नभई चौतर्फी विकासको भूमिका खेल्ने र विद्यार्थी जीवनमा खेलिएका खेलले समग्र जीवनमा उत्साह र उमङ्ग थपिने उहाँले बताउनुभयो ।

कक्षा नर्सरीदेखि कक्षा १० सम्मका सबै विद्यार्थीहरु सहभागी हुने खेलकुद कार्यक्रममा अन्तर सदनात्मक र विभिन्न तहगत गरी बेलुन ब्लास्ट, इन– आउट, स्पुन रेस, थ्रि लेग रेस, म्याथ म्याटिकल रेस, कुर्सी दौड, तातो आलु, ब्याडमिन्टन , टेवल टेनिस, हाइजम्प, लङ्जम्प, सटपुट, दौड, रिले दौड तथा भलिबल लगायतका खेलकुद गराइने छ ।

उक्त प्रतियोगिताबाट ७५० जना विद्यार्थीले मेडल जित्ने अतिरिक्त क्रियाकलाप विभाग प्रमुख प्रकाश चौधरीले जानकारी गराउनुभयो ।