प्रधानमन्त्री केपी शर्मा ओलीले विभिन्न पक्षसँग सघन विमर्श गरी पहिले संविधान संशोधनका विषयको पहिचान गरिने बताउनुभएको छ ।

शुक्रबारदेखि सुरु भएको प्रतिनिधिसभाको हिउँदे अधिवेशनलाई सम्बोधन गर्दै उहाँले पहिचान गरिएका विषयहरुमाथि संसदमा प्रतिनिधित्व गर्ने वा बाहिर रहेका दलहरु र सरोकारवालाहरुसँग छलफल गरिने बताउनुभयो ।

‘हामी स्पष्ट छौं, पार्टीहरुका आ–आफ्नै धारणा र पोजिसन हुनसक्छन् । मिलेका कुरामा साझा धारणा बनाइनेछ, नमिलेका कुरामा बहस र छलफल गरिनेछ’, प्रधानमन्त्रीले भन्नुभयो – ‘संविधान संशोधन विधेयक ल्याउने काम सरकारको हो, बहस÷छलफल आधारित निष्कर्षबाट सरकारले साझा धारणा बनाउँछ र त्यसैमा आधारित संशोधन प्रस्ताव तयार गर्छ ।

’
एक अर्को प्रसंगमा प्रधानमन्त्रीले आफूविरुद्ध काल्पनिक कुरा गरेर समय खेर नफाल्न आग्रह गर्दै कसैको तागत छ भने भ्रष्टाचार गरेको प्रमाण ल्याउन चुनौती दिनुभयो । उहाँले भन्नुभयो– म भ्रष्टाचार पनि गर्दिन र अरु कसैलाई भ्रष्टाचार गर्न पनि दिन्न ।

सरकारले संविधान प्रारम्भ भएपछि अभ्यासमा देखापरेका सबल र दुर्बल पक्ष तथा अभ्यासका क्रममा देखापरेका जटिलताको समीक्षा गरी राजनैतिक स्थायित्वको लागि संविधानमा आवश्यक संशोधन र तदनुकूलको कानून निर्माणलाई प्राथमिकता दिएको प्रधानमन्त्री ओलीले स्पष्ट पार्नुभयो ।

यसैगरी नेपाली कांग्रेसका सभापति शेरबहादुर देउवाले राजनीतिक अस्थीरताका कारण मुलुकमा राजनीतिक तथा आर्थिक अवस्थामा नकारात्मक प्रभाव परेकाले वर्तमान सरकार गठन गर्नुपरेको बताउनु भएको छ ।
शुक्रबार प्रतिनिधिसभा बैठकलाई सम्बोधन गर्दै देउवाले विगतमा स्थिर सरकार नहुँदा मुलुकमा राजनीतिक तथा आर्थिक अवस्थामा नकारात्मक प्रभाव परेकाले अहिलेको सरकार गठन भएको बताउनु भयो ।

उहाँले एमालेसँग सरकार गठनको बेलामा भएको ७ बुँदे सहमतिप्रति नेपाली कांग्रेस दृढ रहेको उल्लेख गर्नुभयो ।
एमालेसँग भएको ७ बुँदे सहमति कार्यान्वयन हुने सभापति देउवाको भनाई छ ।
सभापति देउवाले सरकारको मूल्यांकन गर्दा ६ महिनाको समय पर्याप्त नहुने उल्लेख गर्दै सुरुको अवधिमा धेरै राम्रा काम गरेको र भविष्यमा असल परिणाम देखिनेगरि काम गर्ने जिकिर गर्नुभयो ।