राष्ट्रिय सभा सदस्य तथा पूर्व उपप्रधान एवं गृहमन्त्री वामदेव गौतमले नेपालमा समाजवाद निर्माण गर्न नसकिए आफूलाई मृत्युदण्ड दिइयोस् भन्ने माग गर्नुभएको छ ।
राष्ट्रिय सभा बैठकमा आइतवार सम्बोधन गर्ने क्रममा राष्ट्रपतिबाट मनोनित भएका सांसद तथा नेकपा एकता अभियानका नेता गौतमले वर्ष तोकेर समाजवाद ल्याउन आफूलाई दाउमा राख्न तयार रहेको दावी गर्नुभयो ।
गौतमले भन्नुभयो– समाजवाद निर्माण गर्नका लागि म आफूलाई दाउमा राख्न चाहान्छु । यदि समाजवाद निर्माण गर्न सकिएन भने मलाई मृत्युदण्ड दिइयोस् । वर्ष तोकेरै उहाँले समाजवाद निर्माण गर्न सकिएन भने मलाई फाँसीमा चढाए हुन्छ भन्नुभयो ।
गौतमले १० वर्षभित्र नेपाललाई युरोपियन स्तरमा लैजान सकिने दावी समेत गर्नुभयो । वर्षमा १४ खर्ब रुपैयाँ खर्च गरेर समाजवाद ल्याउने आधार आफूसँग रहेको उहाँको भनाइ थियो ।
सांसद गौतमले फरक–फरक सिद्धान्त बोकेका नेपाली कांग्रेस र नेकपा (एमाले) मिलेर खिचडी राजनीतिक गरिरहेको समेत दावी गर्नुभयो ।
उहाँले फरक सिद्धान्त बोकेका पार्टीको खिचडी राजनीति बहिष्कार गर्नुपर्ने उल्लेख गर्नुभयो ।
केही समयदेखि अध्यादेशले राजनीतिक माहौल बनेकोप्रति टिप्पणी गर्दै उहाँले आफू अध्यादेश पक्षधर पनि नभएको र विपक्षमा पनि नलागेको जिकिर गर्नुभयो ।