सञ्चार तथा सूचना प्रविधि मन्त्री पृथ्वीसुब्बा गुरुङले नेपाललाई आइटी हब बनाउन आवश्यक नीति, कानुन र पूर्वाधार निर्माण गर्न सरकार तयार रहेको बताउनुभएको छ ।
बिहीबार काठमाडौंमा आयोजना भएको ‘क्यान इन्फोटेक’ को ३० औं संस्करणको उदघाटन कार्यक्रममा बोल्नुहुँदै मन्त्री गुरुङले यस्तो बताउनुभएको हो ।
उहाँले नेपाललाई आइटी हबको रूपमा विकास गर्न आवश्यक नीति, कानुन र पूर्वाधार निर्माणका लागि सहजीकरण गर्न मन्त्रालय तयार रहेको जानकारी दिनुभयो ।
उहाँले सरकार र निजी क्षेत्रको सहकार्यमा नेपाललाई आइटी हबको रूपमा विकास गरी विश्वलाई चिनाउनु पर्नेमा जोड दिनुभयो ।
सञ्चारमन्त्री गुरुङले भन्नुभयो– ‘‘आइटी क्षेत्र भर्खर सुरु गरेका छौं । आइटी क्षेत्रलाई आइटी हबका रूपमा विकास गर्न आवश्यक नीति, कानुन र पूर्वाधार निर्माणका लागि सहजीकरण गर्न मन्त्रालय तयार छ ।
सञ्चारमन्त्री गुरुङले आइटी क्षेत्रबाट यो वर्ष गत वर्षभन्दा धेरै राजस्व सङ्कलन हुने विश्वास रहेको बताउनुभयो । उहाँले सरकारले ल्याएको अध्यादेश प्रभावले राजस्व बढाउन सक्ने उल्लेख गर्नुभयो । उहाँले नेपालमा पर्यटनभन्दा आइटी क्षेत्रको योगदान बढी हुने अवस्था रहेको बताउनुभयो ।
सञ्चारमन्त्री गुरुङले भन्नुभयो– ‘‘काम गर्ने वातावरण सरकारले बनायो भने वैज्ञानिक खोज्न नासामा जानु पर्दैन । मुलुकभित्रै उत्पादन हुने रहेछ । सरकारले त्यो काम गर्छ ।