सैनामैना सालझण्डीमा रहेको कोटियादेवी माध्यमिक विद्यालयले भोली फागुन ७ गते बुधबारदेखि श्रीमद भागवत धनधान्याचल ज्ञान महायज्ञ आयोजना गर्ने भएको छ ।

विद्यालयको शैक्षिक स्तरोन्नती, गुणस्तर अभिबृद्धि र जग्गा व्यवस्थापनका लागि आर्थिक सहयोगार्थ बुधबारदेखि हुने महायज्ञ फागुन १४ गतेसम्म हुने भएको हो ।
महायज्ञमा अन्तर्राष्ट्रिय स्तरका प्रखर कथाबाचक प्रबीण पण्डित दिनबन्धु पोखरेलले कथाबाचन गर्ने कार्यक्रम छ ।

विद्यालयले मंगलबार पत्रकार सम्मेलनको आयोजना गरि महायज्ञका बिषयमा जानकारी गराएका हो ।

महायज्ञ आयोजक समितिका संयोजक स्थानीय समाजसेवी तिलकराम घिमिरेले विद्यालयको शैक्षिक स्तर उन्नती, जग्गा व्यवस्थापन र शैक्षिक अभिबृद्धिका लागि महायज्ञ आयोजना गरिएको बताउँदै महायज्ञमा उपस्थित भई विद्यालयको विकासमा सहयोग गर्न सवैसंग आग्रह गर्नुभयो ।विद्यालय व्यवस्थापन समितिका अध्यक्ष गुनाखर घिमिरेले सडकको किनारमा रहेका र पहुँच भएका विद्यालयलाई बजेट पर्ने तर सडकदेखि टाढा ग्रामीण क्षेत्रमा रहेका विद्यालयलाई बेवास्ता गर्ने र हेर्ने दृष्टिकोणमा समेत फरक हुने गरेको भन्दै विद्यालयको आर्थिक अवस्था अत्यन्त कमजोर भएकोले महायज्ञ आयोजना गरिएको बताउनुभयो ।

त्यसैगरी पत्रकार सम्मेलनमा विद्यालयका प्रधानाध्यापक रमेश भुसालले विद्यालयको पूर्वाधार विकासका लागि स्थानीय, प्रदेश र संघीय सरकारले बेलाबेलामा सहयोग गर्दै आएपनि त्यो सहयोगले विद्यालयको आवश्यकता धान्न नसकेकोले महायज्ञ गर्नुपरेको बताउनुभयो ।

महायज्ञमा फागुन ७ गते विहान ७ बजेदेखि ९.३० बजेसम्म पूर्वाङ्ग मूलपाठ, विहान ९.३० बजेदेखि शोभा कलशयात्रा र सोही दिन दिउँसो महायज्ञ उदघाटन गरिने भएको हो ।
त्यसैगरी फागुन ८ गतेदेखि १३ गतेसम्म विहान ७ बजेदेखि १० बजेसम्म नित्य पुजन, विहान ११ बजेदेखि संगीतमय कथा प्रचचन तथा झाँकी र साँझ साढे ४ बजेदेखि साढे ५ बजेसम्म आरती, पुष्पाञ्जली एवं गुरुहरुबाट टिका, फूल प्रसाद प्रदान गर्ने कार्यक्रम रहेको छ ।