रुपन्देहीमा ९२ प्रतिशतलाई पाठेघरको मुखको क्यान्सर विरुद्धको खोप लगाइएको छ । रुपन्देहीमा ५९ हजार दुई सय १५ जना किशोरीलाई पाठेघरको मुखको क्यान्सर विरुद्धको खोप लगाउने लक्ष्य लिइएकोमा ५४ हजार पाँच सय २९ जना किशोरीलाई खोप लगाइएको स्वास्थ्य कार्यालय रुपन्देहीले जनाएको छ ।

रुपन्देहीमा पहिलो चरणमा आठवटा पालिकामा ३० हजार ९२५ जना किशेरीलाई खोप लगाउने लक्ष्य लिएकोमा २८ हजार एक सय ८३ जना किशोरीलाई खोप लगाइएको स्वास्थ्य कार्यालय रुपन्देहीका प्रमुख चिन्तामणि ज्ञवालीले जानकारी दिनुभयो ।
त्यस्तै दोश्रो चरणमा बाँकी रहेका आठवटा पालिकामा २८ हजार दुई सय ९० जना किशोरीलाई खोप लगाउने लक्ष्य लिइएकोमा २६ हजार तीन सय ४६ जनालाई खोप लगाइएको छ ।
पहिलो चरणमा माघ २२ देखि २९ गतेसम्म र दोश्रो चरणमा फागुन १ गतेदेखि ८ गतेसम्म खोप अभियान सञ्चालन गरिएको थियो ।