नेपाली हिन्दुहरुको महान पर्व महाशिवरात्रि पर्व बुधबार देशभरका शिवालयमा विधिपूर्वक पूजा, आराधना एवम् दर्शन गरी मनाइएको छ ।

शिवजी उत्पत्ति हुनुभएको रातका नामबाट नामकरण भएको यो पर्व कालरात्रि, मोहरात्री, सुखरात्री र शिवरात्री नामक चार प्रमुख रात्रीमध्ये एक पवित्र पर्वका रूपमा मनाइन्छ ।

ब्रतमध्ये सर्वोत्तम कहलिएको महाशिवरात्रिका दिन आज भक्तजनले शुद्ध भई शिव मन्दिरमा पूजाअर्चना गरी व्रत बस्ने र भगवान् शिवको प्रिय वस्तु दूध, धतुरो र बेलपत्र चढाउने गर्छन् ।

आजको दिन भगवान महादेवलाई जाडो हुने जनविश्वासले हरेक घर, चोक र मठमन्दिरमा दाउरा मागेर धुनी जगाई भजनकीर्तनका साथ आगोमा प्रसाद बनाई ग्रहण गरिन्छ ।
महाशिवरात्रीको अवसरमा पशुपतिनाथमा बिहान दुई बजेदेखि नै पशुपतिनाथका चार ढोका खोलिएको थियो ।

बुधबार बिहानैदेखि पशुपतिनाथ, भक्तपुरको डोलेश्वर महादेव मन्दिर, सैनामैनाको पर्रोहा बोलबम शिबालय धाम र पाल्पाको सिद्धबाबा मन्दिर तथा बुटवल १६ को नरैनापुर लगायतका विभिन्न स्थानका शिवालयमा बिहानैदेखि भक्तजनको घुइँचो लागेको थियो ।

आफूले चिताएको माग पुग्ने जनविश्वास अनुसार महाशिवरात्रिका दिन शिबालयमा दर्शनार्थीहरुको भीड लाग्ने गरेको छ ।