राजावादीहरूले पुनः देशमा राजा फर्काउने हल्ला चलाए पनि त्यो सम्भव नभएको पूर्व प्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्डले दावी गर्नुभएको छ ।

जनतासँग माओवादीः तराई मधेश जागरण अभियान अन्तर्गत शनिवार बिहान रौतहटको गरुडामा सञ्चारकर्मीहरुसँग कुरा गर्दै अध्यक्ष प्रचण्डले देशमा फेरि राजा फर्किन असम्भव रहेको बताउँदै ज्ञानेन्द्रले पहिले पनि केही ठूलाठूला गल्ती गरेको र जनताले पनि अब त्यो गल्ती नगर्ने दावी गर्नुभयो ।

अध्यक्ष प्रचण्डले भन्नुभयो– मैले त मूर्खता नै भन्छु, पूर्व राजा ज्ञानेन्द्रले अब अहिले पनि फेरि मूर्खता गरेर आफ्नो बाँकी रहेको साख पनि समाप्त पार्ने गल्ती नगरुन् ।’
नेपाली जनताले त्यति बेला उनलाई कारबाही गर्नुको सट्टा आरामसँग बस्न दिएको बताउँदै प्रचण्डले त्यो बेलाको हाम्रो उदारतालाई कमजोरी सम्झेर जबरजस्ती गर्न खोजे भने नेपाली जनताले त्यो सहँदैनन् भन्नुभयो ।’

प्रचण्डले पूर्वराजा ज्ञानेन्द्र शाहलाई राजनीति गर्न मन लागेको भए पार्टी खोलेर चुनाव लड्न र चुनाव जितेर काम गर्न चुनौती समेत दिनुभयो ।
तराई–मधेश जागरण कार्यक्रम अन्तर्गत अध्यक्ष प्रचण्ड शुक्रबार राति रौतहट आउनुभएको हो ।