यस वर्षको माध्यमिक शिक्षा परीक्षा (एसईई) आज विहिवारदेखि शुरू भएको छ । बिहान ८ बजेदेखि देशभरका दुई हजार ७९ परीक्षा केन्द्रबाट एकैसाथ परीक्षा शुरू भएको हो ।

राष्ट्रिय परीक्षा बोर्ड, परीक्षा नियन्त्रण कार्यालयले ढुक्क र निर्धक्क भएर परीक्षामा सहभागी हुन विद्यार्थीहरुलाई आग्रह गरेको छ ।
यस्तै प्रधानमन्त्री केपी शर्मा ओलीले उच्च मनोबलका साथ एसईईमा सामेल हुन विद्यार्थीहरुलाई आग्रह गर्नुभएको छ । भिडियो सन्देशमार्फत उहाँले एसईईमा सहभागी हुने विद्यार्थीलाई धैर्यका साथ परीक्षामा सहभागी हुन आग्रह गर्नुभएको हो ।
यस वर्षको एसईईमा पाँच लाख १४ हजार ७१ जना परीक्षार्थी सहभागी भएका छन ।

यसैगरी रुपन्देही जिल्लाको नयाँगाउँ माध्यमिक विद्यालयका प्रधानाध्यापक तथा नयाँगाउँ माध्यमिक विद्यालय केन्द्रका केन्द्राध्यक्ष पुरुषोत्तम भट्टराईले नयाँगाउँ माध्यमिक विद्यालयको केन्द्रबाट उत्तरी बेल्टका प्राविधिक धारतर्फका १५ वटा विद्यालयको एसईई परिक्षा भएको र पहिलो दिनको परिक्षा अत्यन्त मर्यादित र अनुशासित ढंगबाट भएको बताउनुभयो । उहाँले पहिलो दिनको परिक्षामा सवै विद्यार्थीको उपस्थिति रहेको र यो परिक्षालाई शैक्षिक गुणस्तर कायम गर्नेगरी अत्यन्तै मर्यादित, अनुशासित ढंगबाट विगतदेखि नै संचालन गर्दै आएको र आगामी दिनमा पनि सोही अनुसार हुने प्रतिवद्धता जनाउनु भयो ।

नयाँगाउँ माध्यमिक विद्यालय यसैगरी सैनामैनाका परिक्षार्थीहरुले सैनामैना नगरपालिकाका विभिन्न पाँचवटा विद्यालयको केन्द्रबाट यो बर्षको पहिलो दिनको एसईई परिक्षा दिएका छन । सैनामैनामा सालझण्डी मावि सालझण्डी, रामापुर मावि रामापुर, पर्रोहा मावि मुर्गिया, प्रभात इङलिस बोर्डिङ स्कुल मुर्गिया र सुनगाभा पब्लिक स्कुल मुर्गिया केन्द्रबाट एसईई दिने व्यवस्था मिलाइएको छ ।