२७ वैशाख, काठमाडौं ।
नेपालले आईसीसी महिला टी–२० विश्वकप एसिया छनोटअन्तर्गत आफ्नो दोस्रो खेलमा बहराइनमाथि सहज जीत हात पारेको छ।

थाइल्याण्डको तेरथाइ क्रिकेट मैदानमा शनिबार भएको खेलमा नेपालले बहराइनलाई ९ विकेटले पराजित गर्दै प्रतियोगितामा पहिलो जित दर्ता गर्‍यो। वर्षा र भिजेको मैदानका कारण खेललाई ५ ओभरमा झारिएको थियो।

टस हारेर पहिले ब्याटिङ गरेको बहराइनले निर्धारित ५ ओभरमा १ विकेटको क्षतिमा ४१ रन बनाएको थियो। बहराइनकी कप्तान दिपिका रंगासिकाले १३ बलमा ३४ रनको तेज तर्रार पारी खेल्दै टिमलाई चुनौतीपूर्ण स्कोरमा पुर्‍याइन्। उनी श्रीलंकाबाट अनुभव बटुलेकी खेलाडी हुन्।

४२ रनको लक्ष्य पछ्याउन उत्रिएको नेपालले ४.२ ओभरमा १ विकेटको क्षतिमा लक्ष्य पूरा गर्‍यो। नेपालका लागि कविता कुँवरले १८ रन बनाइन् भने सम्झना खड्का १३ रनमा अविजित रहिन्। कप्तान इन्दु बर्मा ७ रनमा क्रिजमै थिइन्।

यसअघि शुक्रबार हङकङविरुद्धको नेपालको पहिलो खेल वर्षाका कारण रद्द भएको थियो। टससमेत हुन नसकेको उक्त खेलमा नेपाल र हङकङले १–१ अंक बाँडेका थिए।

नेपालले अब मंगलबार हङकङविरुद्ध प्रतिस्पर्धा गर्नेछ। समूह चरणमा नेपालले उत्कृष्ट प्रदर्शन गर्नुपर्ने दबाब कायम नै छ, ताकि विश्वकपको अर्को चरणमा प्रवेशको सम्भावना जीवित रहोस्।