लुम्बिनी, वैशाख २७ – यस वर्ष २५६९औं बुद्ध जयन्ती तथा लुम्बिनी दिवस विशेष र भव्य रुपमा मनाउने तयारी गरिएको छ। लुम्बिनी विकास कोषले वैशाख २८ गतेदेखि ३० गतेसम्म तीन दिने विविध कार्यक्रमसहित बुद्ध जयन्ती मनाउने भएको हो।

लुम्बिनी विकास कोषका कोषाध्यक्ष तथा बुद्ध जयन्ती प्रचार–प्रसार समितिका संयोजक ढुण्डीराज भट्टराईका अनुसार वैशाख २९ गते सोमबारको मुख्य समारोहको उद्घाटन प्रधानमन्त्री केपी शर्मा ओलीले गर्ने कार्यक्रम तय गरिएको छ।

हिन्दू तथा बौद्ध मान्यताअनुसार वैशाख शुक्ल पूर्णिमाका दिन बुद्धको जन्म, बुद्धत्व प्राप्ति र महापरिनिर्वाण एकै दिन परेकाले यस दिनलाई त्रिसंयोग दिवसका रुपमा मनाइन्छ। यसै सन्दर्भमा लुम्बिनी, तिलौराकोट र देवदहमा विविध कार्यक्रम आयोजना गरिने छ।

बुद्ध जयन्ती सफल बनाउन संस्कृति, पर्यटन तथा नागरिक उड्डयन मन्त्री बद्रीप्रसाद पाण्डेको संयोजकत्वमा ५६९ सदस्यीय मूल आयोजक समिति गठन गरिएको छ। लुम्बिनी विकास कोषका उपाध्यक्ष डा. ल्हारक्याल लामाले तीन दिने कार्यक्रम सञ्चालन गर्न करिब १ करोड रुपैयाँ खर्च हुने जानकारी दिनुभयो। उहाँले बुद्ध जयन्तीलाई राष्ट्रिय गौरवसँग जोडिएको ऐतिहासिक अवसर भएको उल्लेख गर्दै सबैको सहभागिता आवश्यक रहेको बताउनुभयो।

कार्यक्रमको पूर्वसन्ध्यामा वैशाख २८ गते आइतबार साँझ मायादेवी मन्दिर परिसरमा अहोरात्र महापरित्राण पाठ हुनेछ। वैशाख २९ गते बिहान ६ बजेदेखि प्रार्थना सभा र साढे ७ बजे ५ नम्बर गेटबाट भिक्षु–भिक्षुणी, लामा गुरु, उपासक–उपासिकासहित शोभायात्रा सुरु हुनेछ।

त्यसैगरी, बृहत्तर लुम्बिनी क्षेत्र सरसफाइ, दीप प्रज्वलन, खेलकुद, शाकाहारी खाना महोत्सव, आँखा शिविर, रक्तदान, नाट्य प्रस्तुति, शान्ति ध्यान, प्रभुति उत्सव जस्ता कार्यक्रमले भरिपूर्ण हुनेछ।

समारोहमा संघीय तथा प्रदेश मन्त्रीहरू, उच्चपदस्थ अधिकारी, कूटनीतिक नियोगका प्रतिनिधि, विदेशी अतिथिसहित संस्कृति पर्यटन तथा नागरिक उड्डयन मन्त्री बद्रीप्रसाद पाण्डेको समेत सक्रिय सहभागिता रहनेछ।

लुम्बिनी विकास कोषले यसवर्षको बुद्ध जयन्ती राष्ट्रिय तथा अन्तर्राष्ट्रिय समुदायमा नेपालको सांस्कृतिक पहिचान उजागर गर्ने महत्वपूर्ण अवसरका रुपमा लिनुपर्ने जनाएको छ।