रुपन्देहीको प्रतिनिधिसभा निर्वाचन क्षेत्र नम्बर ३ मा आउँदो कात्तिक १७ गते उपचुनाव हुने भएको छ ।
सोमबार बसेको निर्वाचन आयोगको बैठकले रिक्त प्रतिनिधिसभा सदस्य पदमा कात्तिक १७ गते उपचुनाव गर्ने निर्णय गरेको निर्वाचन आयोगका कार्यवाहक प्रमुख निर्वाचन आयुक्त रामप्रसाद भण्डारीले बताउनुभयो ।

२०७९ साल मङ्सिर ४ गते भएको चुनावमा रुपन्देही–३ मा राष्ट्रिय प्रजातन्त्र पार्टी (राप्रपा) का तर्फबाट निर्वाचित हुनुभएका दीपक बोहराको निधन भएपछि पद रिक्त रहेको छ ।
बोहोराको गएको चैत १९ गते निधन भएको थियो । बोहराको निधन भएसँगै रिक्त निर्वाचन क्षेत्रमा उपचुनाव हुन लागेको हो ।

योसँगै रुपन्देही–३ मा मतदाता नामावली दर्ता कार्य स्थगित भएको छ ।
उता संघीय लोकतान्त्रिक मोर्चामा आवद्ध मधेश केन्द्रित दलले रुपन्देही–३ को उपनिर्वाचनमा नागरिक उन्मुक्ति पार्टी (नाउपा) को उम्मेदवारलाई सघाउने संकेत गरेका छन् ।

रुपन्देही–३ को उपनिर्वाचनलाई छलफलको पहिलो एजेन्डा बनाएर संघीय लोकतान्त्रिक मोर्चाको दुई दिन बैठक बसिसकेको छ । बिहीबार र आइतबार नाउपाको पहलमा मोर्चाको बैठक बसेको थियो ।

गत निर्वाचनमा नाउपाका उम्मेदवारले त्यस क्षेत्रमा चौथो स्थानको मत ल्याएका थिए । राप्रपाका उम्मेदवार पहिलो, कांग्रेस दोस्रो र रास्वपाले तेस्रो स्थानको मत पाएका थिए ।

मधेश केन्द्रित सात दलमा नाउपाको सबैभन्दा बढी मत हुनु र त्यसपछि जनमतका उम्मेदवारले मत पाउनुले पनि साझा उम्मेदार नाउपाबाट हुने सम्भावना बढी रहेको ती दलका नेताहरुले जानकारी गराएका छन् ।