सैनामैना नगरपालिका वडा नंं ६ मा रहेको कालमोचन शिवालय मन्दिरमा एक महिनासम्म हुने बोलबम जलार्पण यात्रा विहिवारदेखि शुभारम्भ भएको छ ।
विहिवार गुरुपूर्णिमाको दिन श्रद्धालु भक्तजनले पैदल यात्रा गर्दैसैनामैना ६ मा रहेको सरस्वती कुण्डबाट जल उठाई पुनः मन्दिरमा जलार्पण गरेका छन ।

मन्दिर व्यवस्थापन समितिका अनुसार कालमोचन शिबालय मन्दिरमा जलार्पणका लागि असार ३० गते लक्ष्मणघाट, ५ गते त्रिवेणीधाम, १२ गते राम्दी उत्तरबाहिनी र १९ गते कर्णाली चिसापानीबाट जल उठाई जलापण गर्ने कार्यक्रम रहेको छ ।
कालमोचन शिवालय मन्दिरमा गुरुपूर्णिमादेखि जनैपूर्णिमासम्म एक महिनासम्म जलार्पण गर्ने परम्परा रहेको यात्रा संयोजक कृष्णप्रसाद अधिकारीले जानकारी दिनुभयो । यो बर्षपनि बोलबम जलार्पणको कार्यक्रम सुरु भएको र यो एक महिनासम्म संचालन हुने कालमोचन शिवालय मन्दिर समितिले जनाएको छ ।
सोही अवसरमा सैनामैना नगरपालिकाका प्रमुख फणेन्द्रप्रसाद शर्मा, सैनामैना वडा नंं ६ का वडा अध्यक्ष गोपाल पोखरेल र मानव अधिकार तथा शान्ति समाजका पूर्व अध्यक्ष गोविन्द खनाल लगायत सयौं बोलबम श्रद्धालु भक्तजनको सहभागिता रहेको थियो ।