नेकपा एमालेका महासचिव शंकर पोखरेलले नेपालको सहमतिबिना चीन र भारतले नेपाली भूमि प्रयोग गर्न खोज्नु अनुचित हुने बताउनुभएको छ ।
शनिबार घोराहीमा प्रेस चौतारी नेपाल दाङले आयोजना गरेको पत्रकार सम्मेलनमा बोल्दै पोखरेलले लिम्पियाधुरा, लिपुलेक र कालापानी क्षेत्र स्पष्ट नेपालकै भूमि भएको उल्लेख गर्दै सहमतिबिना प्रयोग गर्ने प्रयत्नलाई स्वीकार गर्न नसकिने बताउनुभयो ।
महासचिव पोखरेलले तथ्य र प्रमाणका आधारमा समस्या समाधान गर्न पहल गर्नुपर्ने बताउनुभयो ।

सुगौली सन्धि सन् १८१६ तिरको सिमाना नै वास्तविक सीमा भएको दाबी गर्दै उहाँले नेपालले राखेको अडान तथ्य र प्रमाणमा आधारित रहेको बताउनुभयो । सरकारको कार्यक्षमता र उपलब्धिबारे बोल्दै महासचिव पोखरेलले भन्नुभयो–“अघिल्लो अवस्था र अहिलेको अवस्थालाई तुलना गर्दा यो सरकार सफल देखिएको छ ।

उहाँले विकास निर्माणमा गति आएको उल्लेख गर्दै रोकिएका आयोजनाहरू अघि बढेको र संघीयता कार्यान्वयनसँग जोडिएका कानुन निर्माण पनि अघि बढेको बताउनुभयो ।
यसैबिच, महासचिव पोखरेलले एमालेको दोस्रो विधान महाधिवेशन यही भदौ २१, २२ र २३ गते हुने र त्यसको तयारी भैरहेको जानकारी दिनुभयो ।