राष्ट्रिय खेलकुद परिषद् (राखेप) ले विश्वकप रजत विजेता खो खो टोलीलाई उत्कृष्ट अवार्डसहित पुरस्कृत गरेको छ । राखेपको ६२ औँ वार्षिकोत्सवका अवसरमा काठमाण्डौमा आयोजित कार्यक्रममा खो खो को सिनियरतर्फ राष्ट्रिय पुरुष तथा महिला टोलीलाई उत्कृष्ट अवार्डसहित पुरस्कृत गरिएको हो ।

पुरुष तथा महिला टोलीलाई समान एक लाख रुपैयाँ नगद पुरस्कारसहित ट्रफी प्रदान गरिएको छ । खो खो को दुवै टोलीले भारतमा भएको प्रथम खो खो विश्वकप तथा नेपाल र भारतबीच भएको अभ्यास खेलमा रजत जितेका थिए ।

उत्कृष्ट राष्ट्रिय खेल सङ्घमा नेपाल क्रिकेट सङ्घ (क्यान) एक लाख नगदसहित पुरस्कृत भयो । यस्तै जुनियरको पुरुषमा बक्सिङका अर्पिल राना तथा महिलामा क्रिकेटकी पूजा महतो जनही ५० हजार नगदसहित पुरस्कृत भएका छन् । पारातर्फ तेक्वान्दोकी पलेशा गोबर्धन पनि ५० हजार नगदसहित सम्मानित भइन् ।