सैनामैना नगरपालिका रूपन्देहीबाट रोजगारीको क्रममा संयुक्त अरब इमिरेट्स यूएईमा गएका युवाहरूको संस्था सैनामैना सेवा समाज यूएईले सैनामैना नगरपालिका ६ भरतपुरमा रहेको जनकल्याण माध्यमिक विद्यालयमा एकलाख १ हजार १११ रुपैयाको अक्षयकोष स्थापना गरेको छ ।

समाजले शिक्षाको पहुँचमा सबै बालबालिकाहरूको सुनिश्चितता कायम होस् भन्ने उद्देश्यले शुक्रबार एक कार्यक्रमबीच अक्षयकोष स्थापना गरेको जनाएको छ ।
अक्षयकोषको ब्याजबाट आउने रकमबाट विद्यालयमा अध्ययनरत विपन्न परिवारका विद्यार्थीहरुलाई कापी कलम लगायतका सामाग्री उपलब्ध गराइने भएको हो ।

कार्यक्रमका प्रमुख अतिथि सैनामैना नगरपालिका वडा नंं ६ का वडा अध्यक्ष गोपाल पोखरेलले बिदेशमा रहेरपनि आफ्नो गाउँ ठाउँको बिकासमा सहयोग गर्दै आएकोमा समाजप्रति आभार प्रकट गर्नुभयो । उहाँले सैनामैनाबाट रोजगारीको सिलसिलामा आाफुनो जन्मथलो छोडेर युएई गएका युवाहरुले विद्यार्थीहरुको सहयोगका लागि अक्षयकोष स्थापना गरेकोमा धन्यबाद दिदै यसबाट समाज रुपान्तरणमा सहयोग पुग्ने विश्वास ब्यक्त गर्नुभयो ।

कार्यक्रममा सैनामैना सेवा समाज युएईका संस्थापक अध्यक्ष रामप्रसाद पाण्डेले सबै सैनामैनाबासीहरूको साथ र सहयोगले सामाजिक क्षेत्रमा धेरै पहिलेदेखि काम गर्दै आएको बताउनुभयो । उहाँले सैनामैनाबाट रोजगारीका लागि विदेश गएका युवाहरुले एक छाक नखाएर भएपनि सैनामैनाको शैक्षिक क्षेत्रमा सहयोग गर्दै आएको र त्यसबाट विपन्न परिवारका बालबालिकाले थोरै भएपनि राहत पाएको बताउनु भयो ।

सैनामैना सेवा समाज युएईका अध्यक्ष बिष्णु पन्थीले सैनामैनाका प्रत्येक वडाका एक एकवटा सामुदायिक विद्यालयमा अक्षयकोष स्थापना गर्ने र पछि आवश्यकताको आधारमा सैनामैनाका सामुदायिक विद्यालयहरुमा अक्षयकोष स्थापना गर्दै जाने योजना रहेको बताउनु भएको छ ।

कार्यक्रममा साझा टेलिभिजन एचडीका प्रवन्ध निर्देशक भुवन जिसी, नेपाल रेडक्रस सोसाइटी लुम्बिनी प्रदेश अध्यक्ष कृष्ण पंगेनी, जनकल्याण माध्यमिक विद्यालयका प्रधानाध्यापक अर्जुन पोखरेल लगायतले बोल्दै सैनामैना सेवा समाज युएईले सैनामैनाको शिक्षा क्षेत्रको विकासका साथै बिपन्न परिवारका बालबालिकाकाको पढाईमा सहयोग पु¥याएको भन्दै समाजको प्रशंसा गर्नुभयो ।
सोही अवसरमा सैनामैना सेवा समाज युएईले समाजका महासचिव सुरेन्द्र परियार युएईमा विरामी भएपछि स्वदेश फर्किदा प्लेन खर्च लगायत आवश्यक उपचारमा सहयोग पुगोस भन्ने उद्देश्यले सहयोग रकम पनि शुक्रबार नै हस्तान्तरण गरेको छ । सैनामैना सेवा समाज युएईले गत बर्ष पनि सैनामैनाका सामुदायिक विद्यालयमा अक्षयकोष स्थापना गरेको थियो ।

सैनामैना सेवा समाज युएईका सल्लाहकार मनिराम भट्टराईले स्वागत गर्नुभएको कार्यक्रमको संचालन महासचिव सुरेन्द्र परियारले गर्नुभएको थियो ।