आगामी फागुन २१ गते हुने प्रतिनिधि सभाको निर्वाचनका लागि रुपन्देही क्षेत्र नम्बर ५ बाट नेपाली कांग्रेसका केन्द्रिय सदस्य भरतकुमार शाहको नाम सिफारिस भएको छ । नेपाली कांग्रेस रुपन्देही क्षेत्र नंं ५ क्षेत्रीय समितिबाट पूर्व अर्थराज्यमन्त्री तथा तीन पटकका प्रतिनिधिसभा सांसद भरतकुमार शाहको नाम एकल सिफारिस भएको हो । शाह यसअघि सार्वजनिक लेखा समितिको सभापति हुनुहुन्थ्यो ।

नेपाली कांग्रेस क्षेत्र नंं। ५ का क्षेत्रीय सभापति वसिउल्लाह मुसलमानले बैठकमा शाहको मात्र नाम प्रस्ताव आएकोले एकल सिफारिस गरिएको बताउनुभयो ।
यसैगरी समानुपातिकतर्फ क्षेत्रीय सभापति वसिउल्लाह मुसलमान, मामकला थापा, तथा राष्ट्रियसभाका लागि सूर्यमति उपाध्याय र शेषमन यादवको नाम सिफारिस गरेको छ ।

नेपाली कांग्रेस लुम्बिनी प्रदेशका सदस्य तथा लुम्बिनी प्रदेश सभाका पूर्व सांसद फकरुद्दीन खानले बैठकमा प्रतिनिधि सभा सदस्यका लागि भरतकुमार शाहको नाम मात्रै प्रस्तावका रुपमा आएकोले उहाँको नाम सर्वसम्मत सिफारिस भएको बताउनुभयो ।

नेपाली कांग्रेस रुपन्देही ५ का क्षेत्रीय सभापति वसिउल्लाह मुसलमानले नेपाली कांग्रेस लुम्बिनी प्रदेशका सदस्य विष्णु पोखरेल यसअघि पार्टी अनुशासन विपरित काम गरेपछि पार्टीले निष्कासन गरेकोले उहाँलाई बैठकमा नबोलाईएको बताउनुभयो ।
नेपाली कांग्रेसले विष्णु पोखरेललाई गत निर्वाचनमा पार्टीका आधिकारीक उमेदवारलाई नसघाएको भन्दै कारवाहीका लागि पार्टीमा निवेदन परेपछि लुम्बिनी प्रदेशको सदस्य पदबाट निष्कासन गरेको थियो ।