सैनामैना, २५, बैशाख

रुपन्देहीको सैनामैना नगरपालिकाले जग्गा प्रशासन मालपोत सम्वन्धि सेवा प्रवाह गर्न नेपाल सरकारबाट पहिलो चरणमै स्वीकृति प्राप्त गरेको छ ।
नेपाल सरकारले पहिलो चरणमा साउन १ देखि लागू हुने गरी जग्गा प्रशासन सम्वन्धि सवै सेवा प्रदान गर्न देशभरका ३५ वटा स्थानीय तहलाई छनौट गरेकोमा रुपन्देहीबाट सैनामैना नगरपालिकामात्रै परेको हो ।

अव सैनामैना नगरपालिकाका सेवाग्राहीले जग्गा पास, नामसारी, लगत कट्टा लगायत मालपोत सम्वन्धि सवै सेवा सैनामैना नगरपालिकाबाट पाउने भएका छन । सैनामैना नगरपालिकाले भने जेठ १५ गतेदेखि नै मालपोतको सेवा दिने तयारी गरेको सैनामैना नगरपालिकाका प्रमुख प्रशासकीय अधिकृत तुलसीराम मरासिनीले जानकारी दिनुभयो ।

नेपाल सरकारले लुम्बिनी प्रदेशबाट चारवटा पालिकालाई मात्रै पहिलो चरणमा जग्गा प्रशासन सम्वन्धि काम गर्न स्वीकृति प्रदान गरेको छ ।
लुम्बिनी प्रदेशबाट सैनामैना नगरपालिका रुपन्देही, राजापुर नगरपालिका बर्दिया, मुसिकोट नगरपालिका वामीटक्सार गुल्मी र राप्तीसोनारी गाउँपालिका अगैवा बाँके पनि जग्गा प्रशासन सम्वन्धि सेवा प्रदान गर्न नेपाल सरकारबाट स्वीकृत भएका छन ।

सरकारले छनौट भएका पालिकाबाट सेवा प्रवाह गर्दा आवश्यक पर्ने पूर्वाधार तथा जनशक्तिको व्यवस्था भए नभएको वा व्यवस्था हुन सक्ने अवस्था रहे नरहेको सम्बन्धमा सात दिनभित्रमा भूमि ब्यवस्थापन तथा अभिलेख विभागमार्फत प्रतिवेदन पेस गर्न सम्वन्धित क्षेत्रको भूमि प्रशासन कार्यालयको नेतृत्वमा समिति समेत गठन गरेको छ ।

रुपन्देहीको हकमा उक्त समितिमा भूमि प्रशासन कार्यालय बुटवल र नापी कार्यालयमा कार्यरत कर्मचारी टोली सदस्य रहेका छन । उक्त समितिले शुक्रबार सैनामैना नगरपालिकामा स्थलगत भ्रमण गरि जग्गा प्रशाासन सेवा सुचारु गर्न आवश्यक जनशक्ति, पूर्वाधार लगायतको विषयमा निरिक्षण गरेको थियो ।