रुपन्देहीको तिलोत्तमा–२ स्थित होराइजन गौतमबुद्ध माध्यमिक विद्यालयले भोटेकोशी नदीमा आएको विनाशकारी बाढी तथा विपद्बाट प्रभावित नागरिकको राहत र पुनःस्थापनाका लागि ५ लाख ८० हजार ५५५ रुपैयाँ सहयोग गरेको छ । विद्यालयले जारी गरेको विज्ञप्ति अनुसार बाढीका कारण ज्यान गुमाएका नागरिकप्रति श्रद्धाञ्जली तथा शोकसन्तप्त परिवारप्रति समवेदना व्यक्त गर्दै विद्यालय परिवारले सहयोग रकम जुटाएको हो ।

उक्त रकममध्ये होराइजन गौतमबुद्ध माविको तर्फबाट ५ लाख ५५ हजार ५५५ रुपैयाँ र इन्टरएक्ट क्लब अफ होराइजन जीबीएसको तर्फबाट २५ हजार रुपैयाँ गरी कुल ५ लाख ८० हजार ५५५ रुपैयाँ प्रधानमन्त्री राहत कोषमा जम्मा गरिएको विद्यालयले जनाएको छ ।
विद्यालयले विपद्का कारण पीडित तथा प्रभावित नागरिकको साथमा उभिनु सामाजिक दायित्व भएको उल्लेख गर्दै राहत, उपचार, उद्धार तथा पुनःस्थापनाका लागि सबै पक्षबाट सहयोग आवश्यक रहेको जनाएको छ ।