महालेखा परिक्षक कार्यालयको हालै सार्वजनिक गरिएको ६१ औं प्रतिवेदन अनुसार रुपन्देहीमा सवैभन्दा कम बेरुजु हुने पालिकामा कञ्चन गाउँपालिका परेको छ ।

कञ्चन गाउँपालिकाका प्रमुख प्रशासकीय अधिकृत सागर गौतमका अनुसार गत बर्ष बेरुजु ४ करोड बढी थियो भने यो बर्ष बेरुजु जम्मा १ करोड ६० लाखमा झरेको छ ।

प्रमुख प्रशासकीय अधिकृत सागर गौतमले बेरुजु घटनुमा जनप्रतिनिधि र कर्मचारीहरुको संयुक्त प्रयासले नै सम्भव भएको बताउनु भयो ।
कञ्चनमा पछिल्लोसमय बेरुजु कम हुनुको प्रमुख कारणमा असारे विकासको प्रवृत्तिलाई निरुत्साहित गर्नु मूख्य रहेको छ ।
विगतमा असार लागेपछि कामको सम्झौता हुने र कतिपय कामहरु नियम विपरित हुने र व्यवहारिकता हेरेर गरिदिने गरेका कारण पनि बेरुजु बढी हुने गरेको थियो । अहिले भने कञ्चन गाउँपालिकाले असारे विकासको प्रवृत्तिलाई निरुत्साहित गरेपछि बेरुजु घटाउन ठूलो सहयोग पुगेको हो ।

प्रमुख प्रशासकीय अधिकृत गौतमले नयाँ आर्थिक बर्षको सुरुको महिनादेखि नै बराबर चाप हुनेगरि सन्तुलन मिलाएर काम गरिएकोले समयमै योजना सम्झौता हुने र काम पनि सोही अनुसार निर्धारित समयमै हुने र भुक्तानी समेत समयमै हुने गरेकोले बेरुजु कम गर्न सहयोग पुगेको बताउनु भयो ।

कञ्चन गाउँपालिकाले धेरै काम नियम कानुन अनुसार गर्दै आएको र नियम बिपरितका कामलाई निस्तेज गरेकोले बेरुजु घटाउन सहयोग पुगेको पालिकाले जनाएको छ ।

कञ्चन गाउँपालिका जिल्लाकै सवैभन्दा कम बेरुजु भएको पालिका बन्दैगर्दा बुटवल उपमहानगरपालिका रुपन्देहीका १६ स्थानीय तहमध्ये सबैभन्दा धेरै बेरुजु हुने पालिका भएको छ ।

रुपन्देहीका १६ पालिकाको कूल बेरुजु रकम ८७ करोड, ७० लाख, ५१ हजार रुपैयाँमध्ये बुटवलको मात्रै १८ करोड एक लाख १६ हजार रुपैयाँ छ ।
२०७९ को स्थानीय तह निर्वाचनबाट बुटवलमा नेपाली कांग्रेस र माओवादी केन्द्रको गठबन्धनबाट नेपाली कांग्रेसका खेलराज पाण्डेय प्रमुखमा तथा एमालेकी सावित्रादेवी अर्याल उपप्रमुखमा निर्वाचित हुनुभएको थियो ।
बहुमतको आडमा बजेट वितरण र खर्च गर्दा बेरुजु रकम धेरै भएको उपमहानगरकै कर्मचारीहरु बताउँछन् ।