लुम्बिनी बाणिज्य क्याम्पस बुटवलले १७ औं पुस्तकालय दिवस विभिन्न कार्यक्रम गरि शनिवार मनाएको छ । पुस्तकालय दिवसकै अवसरमा क्याम्पसमा योगदान पु¥याउने प्राध्यापक तथा विभिन्न परिक्षामा उत्कृष्ट अंक ल्याउने विद्यार्थीहरुलाई क्याम्पसले सम्मान गरेको छ ।
कार्यक्रममा प्रमुख अतिथिको रुपमा बरिष्ठ साहित्यकार डाक्टर मुरारी पराजुलीले सम्बोधन गर्दै जब राज्य गैर जिम्मेवार हुन्छ अनि युवाहरु विदेश पलायन हुन बाध्य हुन्छन र हामी सधैभरी पछौटेको पछौटे हुन्छौं भन्नुभयो । उहाँले पढ्दा पढ्दै पनि अवसर प्राप्त नहुँदा विद्यार्थी भाई बहिनीहरु निरास हुनुपर्ने अवस्था रहेको र विदेशका लागि खुट्टा चाल्नुपर्ने बाध्यता रहेको उल्लेख गर्नुभयो ।

त्यसैगरी कार्यक्रममा क्याम्पसका प्रमुख डा.ताराप्रसाद उपाध्यायले लुम्बिनी बाणिज्य क्याम्पसले एउटा अठोट गरेको बताउँदै त्यो भनेको कुनैपनि जटिल अवस्थामा पनि क्याम्पसले समयको कदर गर्ने प्रतिवद्धता जनाउनुभयो । उहाँले नेपाली विग्रेको समयको कदर नगरेरै हो भन्दै आफूलाई समयको कदर नगर्ने र अरुलाई दोषारोपण गर्ने प्रवृत्ति हटाउन आग्रह गर्नुभयो ।

क्याम्पसका सह प्राचार्य माधवप्रसाद नेपालको अध्यक्षतामा भएको कार्यक्रममा स्वागत मन्तब्य क्याम्पसका मूख्य सहायक दिपक भट्टराईले गर्नुभएको थियो । त्यसैगरी प्राध्यापक संघका अध्यक्ष उपप्राध्यापक धनबहादुर पुन, कर्मचारी संघका पुष्कर भुसाल लगायतले बोल्नुभएको थियो भने कार्यक्रमको संचालन उपप्राध्यापक पुनाराम भुसालले गर्नुभएको थियो ।
त्यसैगरी क्याम्पसले पुस्तकालय दिवसको अवसरमा बिबिए एफए चौथो सेमेष्टरमा अध्ययनरत बर्षा राना, बिबिएम चौथो सेमेष्टरमा अध्ययनरत दिवस राना मगर र सन्देश बुढाथोकीलाई सम्मान गरेको छ । त्यसैगरी क्याम्पसले आयोजना गरेको निवन्ध लेखन प्रतियोगितामा प्रथम हुने रेखा अर्याल र द्वितीय हुने श्रृष्टि श्रेष्ठलाई पनि सम्मान गरिएको थियो ।
त्यसैगरी क्याम्पसले उपप्राध्यापक सन्ध्या काफ्ले, सह प्राध्यापक भरत भुसाल, उपप्राध्यापक धनबहादुर पुन र चिरञ्जीवी गौतमलाई पनि सम्मान गरेको थियो ।