रुपन्देहीको सैनामैना नगरपालिका १ तीनकुने परमेश्वर टोलकी पेमा खनाल पोखरेलले विगत ६ बर्षदेखि फूलखेती गर्दै आउनुभएको छ । अन्य खेतीभन्दा फूलखेतीमा राम्रो आम्दानी हुने भएकोले अरु दिदी बहिनीहरुलाई त्यत्तिकै खाली बस्नुभन्दा फूल खेती गरेर आम्दानीमा जोडिन आग्रह गर्नुभएको छ ।
कोरोना कालकै बेलामा सुरुमा दुईकटठामा फूल फूल खेती गर्नुभएकी पेमाले बीचमा फूलखेती बढाउनु भएको थियो तर बीचमा कोरोना लगायत समस्याका कारण फूल विक्री हुन छोडेपछि अहिले दुई कटठामै फूल खेती गरिरहेको बताउनु भयो ।

पेमा खनाल पोखरेललाई सैनामैना नगरपालिका कृषि शाखाले पनि फूल खेती गर्न सहयोग र प्रोत्साहन गरेको छ । दुई कटठामै फूल खेती गर्दापनि उहाँले ८० हजारसम्म आम्दानी गर्न सफल हुनुभएको बताउनुभयो । उहाँले भारतबाट आउने प्लाष्टिकका माला प्रयोग नगरेर नेपालकै महिला दिदी बहिनीहरुले उत्पादन गर्ने फूलका माला प्रयोग गर्न समेत आग्रह गर्नुभयो ।

फूल खेतीलाई सरकार तथा स्थानीय पालिकाले प्रोत्साहन गर्ने
हो भने फूल खेतीमा अझै महिला दिदी बहिनीहरु जोडिने र आय आर्जनमा सहयोग पुग्ने उहाँको भनाई छ । नेपाली माला प्रयोग गरेर नेपालको पैसा विदेश जान रोक्नुपर्ने उहाँले आग्रह गर्नुभयो ।