रुपन्देहीको सैनामैना नगरपालिका ३ मुर्गिया स्थित नवदुर्गा भवानी शैलपुत्री शक्ति पिठमा डेढ करोड दिप प्रज्वलन गरिएको छ । मन्दिरको ५० औं वर्ष पूरा भएको अवसरमा हरिबोधनी एकादशीका दिन मंगलबार एक कार्यक्रमको आयोजना गरि डेढ करोड दिप प्रज्वलन गरिएको मन्दिर व्यवास्थापन समितिले जनाएको छ ।

दिप प्रज्वलन कार्यक्रममा सैनामैना लगायत अन्य पालिकाहरुबाट समेत गरि हजारौं श्रद्धालुभक्तजनहरुको सहभागिता रहेको थियो । सैनामैनाको इतिहासमा पहिलोपटक डेढ करोड दिप प्रज्वलन गरिएको मन्दिर व्यवस्थापन समितिका अध्यक्ष कृष्णप्रसाद कंडेलले बताउनुभयो । ‘श्रद्धालु भक्तजनहरुको उत्साहजनक सहभागिताले हामीलाई उत्साह थपेको छ, हामीले एक करोड दिप प्रज्वलन गर्ने भनेका थियौं तर भक्तजनहरुको उत्सहले डेढ करोड दिप प्रज्वलन गर्न सफल भयौं’–उहाँले भन्नुभयो ।

दिप प्रज्वलनका लागि विभिन्न टोल विकास संस्था, आमा समुह र भक्तजनहरुले नाम टिपाई दिप (धागो) बनाएका थिए । पुजाको आरम्भ पश्चात श्रीमद् भागवत पाठपारायण, वेद, चण्डी, गीता पाठपारायण, रुद्राभिषेक, करोड दिप प्रज्वलन, तुलसी विवाह, श्रृंगारिक सन्ध्याकालिन महाआरती प्रज्वलन र भजन किर्तन सहितका कार्यक्रम दिनभर गरिएको मन्दिर व्यवस्थापन समितिका सचिव गोकर्ण आचार्यले बताउनुभयो ।
मन्दिरको ५० औं वर्ष पूरा भएको अवसर पारि गत श्रावण २ गते देखि प्रत्येक महिनाको एकादशीमा श्रृंगारिक सन्ध्याकालिन महाआराति सहित मन्दिरमा भजनकिर्तन गरिदै आएको थियो ।

मन्दिर विक्रम सम्बत २०३१ सालमा स्थापन गरिएको थियो । अहिले नवदुर्गा मन्दिरको शैलपुत्री शक्ति पिठका रुपमा विकास गर्ने गरी गुरुयोजना सहित मन्दिरलाई यस क्षेत्रकै महत्वपूर्ण धार्मीक पर्यटन क्षेत्रको रुपमा विकास गर्ने गरि मन्दिरको पुनः निर्माणको काम थालिएको छ । जस अन्तरगत गेट निर्माण र बाउण्डरीका काम भैरहेका छन् ।