बुटवल सुख्खानगरस्थित दीप बोर्डिङ स्कुलको आयोजनामा जिल्लास्तरीय अन्तर विद्यालय आधुनिक गायन प्रतियोगिता ‘दीप गायन तारा’ को बाह्रौंं संस्करण यही माघ २५ र फागुन ५ गते हुने भएको छ ।
हरेक वर्ष आयोजना हुँदै आएको प्रतियोगितामा रुपन्देहीका सरकारी र निजी विद्यालयका कक्षा १० सम्मका विद्यार्थीले भाग लिन पाउने छन् ।
प्रतियोगिताको उपाधि विजेतालाई नगद ३० हजार, उपविजेतालाई २० हजार र तेस्रो हुनेलाई नगद १० हजारसहित शिल्ड र प्रमाणपत्र दिइने विद्यालयका प्राचार्य टिकाराम न्यौपानेले बताउनुभयो ।
प्रतियोगितामा ४० जना भन्दा बढीले विद्यार्थीले भाग लिनेछन् । प्रतियोगिताको पहिलो चरण माघ २५ र अन्तिम चरण फागुन ५ गते हुने छ । विद्यालय व्यवस्थापन समितिका अध्यक्ष राजेन्द्रप्रसाद ध्वजूले अतिरिक्त क्रियाकलापहरुलाई प्राथमिकतामा राख्दै आएका कारण दीप गायन तारालाई निरन्तरता दिन सकिएको बताउनुभयो ।

प्रतियोगिताबारे जानकारी गराउन शनिबार विद्यालयमा आयोजित पत्रकार सम्मेलनमा बोल्दै प्राचार्य न्यौपानेले विद्यार्थीको सर्वाङ्गिण विकासका लागि पाठ्यपुस्तकभन्दा माथि उठेर यस्ता गतिविधि सञ्चालन गर्दै आएको जानकारी दिनुभयो ।

प्रतियोगिताका लागि पहिलो चरणमा प्रतियोगीले ट्रयाकबिना गीत गाउनु पर्ने छ भने यस चरणबाट उत्कृष्ट २० जनालाई दोस्रो चरणका लागि छनोट गरिने छ । दिप गायन तारा १२ औं संस्करणका संयोजक श्याम बस्यालले दिप गायन तारामार्फत अहिलेसम्म राष्ट्रिय स्तरका कलाकार उत्पादन गर्न सक्षम भएको बताउँदै माघ २५ देखि सुरु हुने प्रतियोगितामा भाग लिन विद्यार्थीहरुसंग आग्रह गर्नुभयो ।

अहिलेसम्म अस्मिता चापागाईं, प्रिया भण्डारी, अक्सर अली, जुना गुरुङ, नवीन परियार, दिप्सन श्रेष्ठ, वर्षा परियार, सक्सेस पाण्डे, कुशल आचार्य, विवेक पंगेनी र रिदिमा सिंजाली गरी ११ जना विद्यार्थीहरु दीपगायन तारा बन्न सफल भएका छन् । ती विद्यार्थीहरु हाल राष्ट्रिय कलाकारिताका क्षेत्रमा स्थापित भएको विद्यालयको भनाई छ ।