इलाका प्रहरी कार्यालय बुटवलले लामो समयदेखि मोटरसाईकल चोरीमा संलग्न गिरोहलाई पक्राउ गरेको छ ।
बुटवल र रुपन्देहीका विभिन्न गाउँबाट मोटरसाइकल चोरी गर्ने गिरोहको ७ जनालाई प्रहरीले पक्राउ गरेको हो । उनीहरुबाट ६ थान चोरी भइका मोटरसाइकल बरामद भएको प्रहरीले जनाएको छ ।

पक्राउ पर्नेहरुमा रुपन्देही सैनामैना नगरपालिका वडा नं. ५ का १८ वर्षिय राजु थारु, सोही स्थानका १९ वर्षिय अमित भन्ने जंगबहादुर थारु, २० वर्षिय सुदिप थारु, वडा नम्बर ४ का १९ वर्षिय गणेश थारु, १८ वर्षिय निम बहादुर थारु, १९ वर्षिय बिक्की नाउ र १८ वर्षिय बिनोद हरिजन रहेका छन् ।

इलाका प्रहरी कार्यालय बुटवलका प्रमुख प्रहरी नायव उपरिक्षक बिजय पण्डितले बुटवल उपमहानगर, सैनामैना नगरपालिका, तिलोत्तमा नगरपालिका लगायत जिल्लाका विभिन्न स्थानहरुबाट मोटरसाईकल र स्कुटरहरु चोरी भएको भन्दै जनगुनासो बढेपछि प्रहरीले खोजतलासका लागि टोली खटाएको बताउनुभयो ।

उहाँले इलाका प्रहरी कार्यालय बुटवल, वडा प्रहरी कार्यालय बुटवल रामनगर र इलाका प्रहरी कार्यालय रन्यौरा (मुर्गिया) बाट चोरी भएका सवारी साधनहरु र चोरी गर्ने व्यक्तिहरुलाई खोजतलासको लागि संयुक्त प्रहरी टोली खटाइएकोमा चोरीमा संलग्न ७ जनालाई पक्राउ गरेको र उनीहरुबाट चोरी भएका ६ थान मोटरसाईकल बरामद भएको जानकारी दिनुभयो ।
साथै पक्राउ परेकाहरुलाई रुपन्देही जिल्ला अदालतबाट म्यादथप गरी अनुसन्धान भईरहेको प्रहरीले जनाएको छ ।
उता जिल्ला प्रहरी कार्यालय रुपन्देहीको तथ्यांक अनुसार पछिल्लो साढे ६ महिनाको अवधिमा जिल्लाबाट मात्रै २ सय ६९ वटा मोटरसाइकल चोरी भएको छ ।