रुपन्देहीको सैनामैना नगरपालिका ११ मा रहेको कोटियादेवी माध्यमिक विद्यालयमा फागुन ७ देखि १४ गतेसम्म श्रीमद भागवत धनधान्याचल ज्ञान महायज्ञ हुने भएको छ ।
विद्यालयको शैक्षिक स्तरोन्नती, गुणस्तर अभिबृद्धि र जग्गा व्यवस्थापनका लागि आर्थिक सहयोगार्थ आयोजना हुन लागेको महायज्ञमा अन्तर्राष्ट्रिय स्तरका प्रखर कथाबाचक प्रबीण पण्डित दिनबन्धु पोखरेलले कथाबाचन गर्नु हुने कार्यक्रम छ ।
महायज्ञ सम्पन्न गर्न समाजसेवी तिलकराम घिमिरेको संयोजकत्वमा १ हजार ५ सदस्यीय मूल आयोजक समिति गठन गरिएको छ ।
महायज्ञ तयारीको पूर्व सन्ध्यामा मंगलवार सैनामैना वडा नं. १० का विभिन्न कृयाशील संघसंस्था, टोलविकास संस्था, जनप्रतिनिधि लगायत समाजसेवी र स्थानीयसंग अन्तरक्रिया आयोजना गरिएको छ ।
त्यस अवसरमा बोल्नेहरुले महायज्ञलाई सफल रुपमा सम्पन्न गराउने प्रतिवद्धता जनाएका छन ।
महायज्ञ आयोजक समितिका अनुसार फागुन ७ गते विहान ७ बजेदेखि ९.३० बजेसम्म पूर्वाङ्ग मूलपाठ कार्यक्रम हुनेछ भने फागुन ७ गते विहान ९.३० बजेदेखि शोभा कलशयात्रा सुरु हुनेछ । फागुन ७ गते दिउँसो १२.३० बजे महायज्ञको समुदघाटन हुने तयारी छ ।
महायज्ञका अवसरमा हरेक दिन नित्य पुजा, संगीतमय कथा प्रचचन तथा झाँकी, साँझमा आरती, पुष्पाञ्जली एवं टिका, फूल प्रसाद प्रदान गर्ने कार्यक्रम रहेको छ ।