पुरानो फागु संस्कृति लोप हुँदै गएको भन्दै थारु कल्याणकारी सभा सैनामैना रुपन्देहीले विहिवारदेखि तिन दिने फगुवा मिलन कार्यक्रम सुरु गरेको छ ।

तराईमा शुक्रबार होली मनाउने कार्यक्रम छ तर थारु कल्याणकारी सभाले विहिवारदेखि नै तिनसम्म फागु गीत र संस्कृति संरक्षण गर्दै फगुवा मिलन कार्यक्रम सुरु गरेको हो ।
फगुवा मिलन कार्यक्रमको शुभारम्भका अवसरमा बोल्दै सैनामैना नगरपालिकाका प्रमुख फणेन्द्रप्रसाद शर्माले थारु समुदायले हरेक बर्ष थारु समुदायको फगुवा पर्व संस्कृृृति संरक्षणकै रुपमा मनाउँदै आएको स्मरण गर्दै आफ्नो संस्कृति संरक्षण गर्नु थारु समुदायको मौलिकता भएको बताउनुभयो ।

नेपाल कम्युनिष्ट पार्टीका पोलिटव्यूरो सदस्य बसन्त श्रेष्ठले थारु समुदायले बर्षौदेखि पुरानो गीत गाएर होली खेल्दै आएको बताउँदै पुरानो संस्कृति संरक्षण गर्न थालिएको अभियानको प्रशंसा गर्नुभयो ।

यसैबीच थारु कल्याणकारी सभा सैनामैनाले थारु गाउँहरुमा फागु गीत गाएर पुरानो संस्कृति संरक्षण गर्ने र नयाँ पुस्तालाई थारु फागु गीतप्रति अभिरुची जगाउन प्रेरणा दिने गरि तीन दिन होली मनाउन लागिएको जनाएको छ ।
थारु कल्याणकारी सभा सैनामैनाका अध्यक्ष दुलवहादुर थारुले थारु भाषाका फागु गीत र संस्कृति लोप हुन लागेपछि आफूहरुले तिन दिने अभियान सुरु गरेको बताउनुभयो ।