प्रधानमन्त्री कप एकदिवसीय पुरुष राष्ट्रिय क्रिकेट प्रतियोगितामा नेपाल पुलिस क्लब लगातार आठ जीतसहित एक खेलअघि नै फाइनलमा पुगेको छ ।
दाङको देउखुरी रंगशालामा भएको खेलमा पुलिसले कर्णाली प्रदेशलाई ४४ रनले हरायो । पुलिसले दिएको १ सय ४८ रनको लक्ष्य पछ्याएको कर्णाली २४ ओभरमा १ सय ३ रनमा अलआउट भयो । कर्णालीका रविन्द्र शाहीले ४९ र अर्जुन घर्तीले ३० रन बनाए पनि अन्य ब्याटरले दोहोरो अङ्कमा रन जोड्न सकेनन् । पुलिसका ललित राजवंशीले ६ विकेट लिए ।

योसँगै ललित प्रधानमन्त्री कप क्रिकेटमा एक सय विकेट लिने पहिलो बलर बनेका छन् । ललितले ४२ खेलमा यो उपलब्धि हासिल गरेका हुन् । प्रधानमन्त्री कप क्रिकेटमा सबैभन्दा धेरै विकेट लिने खेलाडीको दोस्रो स्थानमा त्रिभुवन आर्मी क्लबका शाहब आलम छन् । शाहबले ४८ खेलमा ९९ विकेट लिएका छन् ।

यसअघि टस हारेर ब्याटिङको निम्तो पाएको पुलिसले ४८ ओभरमा १ सय ४७ रन बनाउँदा सबै विकेट गुमायो । पुलिसका अर्जुन साउदले ३६, दिलिप नाथले ३४ रन बनाए । कर्णालीका अनुज चनाराले ४ विकेट लिए । यो जीतसँगै पुलिस ८ खेलमा १६ अङ्कसहित तालिकाको शीर्ष स्थानमा छ । कर्णाली ९ खेलमा ८ अङ्कसहित पाँचौं स्थानमा छ ।

यस्तै रुपन्देहीको एक्स्ट्राटेक ओभल मैदानमा भएको खेलमा पनि मधेश प्रदेशले सुदूरपश्चिम प्रदेशलाई ४४ रनले हराएको छ । मधेशले दिएको १ सय ३ रनको लक्ष्य पछ्याएको सुदूरपश्चिम २९ ओभरमा ५८ रनमा अलआउट भयो । सुदूरपश्चिमका हेमन्त धामीले सबैभन्दा धेरै १९ रन बनाए पनि अन्य ब्याटरले दोहोरो अङ्कमा रन जोड्न सकेनन् । मधेशका विशाल पटेलले ६ विकेट लिए ।