नेपाली कांग्रेसका सभापति शेरबहादुर देउवाले आन्दोलनरत शिक्षकको जायज माग पूरा गर्न सरकारको ध्यान जानुपर्ने बताउनु भएको छ । नेपाल मुस्लिम संघले आइतबार कांग्रेस पार्टी कार्यालय सानेपा काडमाण्डौमा आयोजना गरेको शुभकामना आदान प्रदान कार्यक्रममा बोल्दै सभापति देउवाले वार्ता र सम्वादबाट आन्दोलनरत शिक्षकको जायज माग पूरा गर्न सरकारको ध्यान जानुपर्ने बताउनु भएको हो ।
सभापति देउवाले शिक्षकहरुको माग सम्बोधन गर्न कुनै समस्या देखिए छलफलबाटै निकास निकाल्नुपर्ने भन्दै यसका लागि शिक्षकहरु पनि तयार हुनुपर्ने जिकिर गनुर््भयो । उहाँले शिक्षकहरुका माग सरकारले पूरा गर्नुपर्ने र त्यसका लागि आफूले पनि सरकारसंग कुरा गर्ने प्रतिवद्धता जनाउनुभयो ।

त्यस्तै सभापति देउवाले वर्तमान संविधानको व्यवस्था अनुसार कुनैपनि पार्टीको बहुमत आउन गाह्रो भएपनि सबैलाई मिलाउन सक्ने नेपालको संविधान रहेको दावी गर्नुभयो ।

अहिलेको संविधानले समावेशी समानुपातिक प्रतिनिधित्व गराउन निकै ठूलो भूमिका खेलेको उहाँको भनाई छ ।
देउवाले भन्नुभयो– हाम्रो देश समावेशी र समानुपातिकताको आधारमा अघि बढिरहेको छ । यसमा मुस्लिम समुदायको पनि प्रतिनिधित्व छ, नेपालको संविधान अत्यन्तै राम्रो छ । सबैलाई मिलाउन सक्ने संविधान छ ।’
उहाँले मुस्लिम समुदायबाट पनि धेरै नेताहरूको प्रतिनिधित्व आफ्नो पार्टीमा रहेको भन्दै उक्त विषय खुसीको कुरा हो भन्नुभयो ।