रुपन्देहीको सैनामैना नगरपालिकामा दलित समुदायका लागि आयोजित आधारभूत जुत्ता कालिगढ तालिम सफलतापूर्वक सम्पन्न भएको छ। सैनामैना–६, कलौनीस्थित भगत सर्वजीत प्रतिष्ठानको भवनमा चैत १४ गतेदेखि बैशाख २७ गतेसम्म सञ्चालन भएको तालिममा १५ जना प्रशिक्षार्थी सहभागी थिए।

सैनामैना नगरपालिकाको आयोजना र सामुदायिक जागरण विकास मञ्च, रुपन्देहीको व्यवस्थापनमा सम्पन्न तालिमको समापन समारोहमा उपप्रमुख बिना रानाले सिप सिकेर आत्मनिर्भर बन्नेमा जोड दिनुभयो। उहाँले सिपले मात्र आर्थिक उपार्जनलाई सहज बनाउने नभई, सामाजिक दृष्टिकोण पनि बदल्ने उल्लेख गर्नुभयो।

कार्यपालिका सदस्य तथा सामाजिक विकास समितिका संयोजक सुरज बरालले कुनै पनि सिप सानो वा ठूलो नहुने भन्दै सिप सिकेर जीवनलाई रोजगारीसँग जोड्नुपर्नेमा जोड दिनुभयो।

कार्यक्रममा सैनामैना कपडा तथा सिलाई व्यवसायी समितिका अध्यक्ष सन्तोष परियारले स्वागत मन्तव्य दिनुभयो भने निमित्त प्रशासकीय अधिकृत शिवलाल अर्याल, दलित उत्थान नगर समितिका अध्यक्ष जयलाल विश्वकर्मा लगायतले शुभकामना मन्तव्य दिनुभयो। कार्यक्रमको सञ्चालन भगत सर्वजीत स्मृति प्रतिष्ठानकी सहसचिव सुमित्रा सुनारले गर्नुभएको थियो।

सिप विकास तालिमले स्थानीय समुदायको जीवनस्तर उकास्न महत्वपूर्ण भूमिका खेल्ने विश्वास व्यक्त गरिएको छ।