प्रतिनिधिसभाको बैठक आज, प्रधानमन्त्रीले प्रश्नको जवाफ

६ जेठ, काठमाडौं — प्रधानमन्त्री केपी शर्मा ओली अस्वस्थ भएपछि आजको प्रतिनिधिसभा बैठकको प्रश्नोत्तर कार्यसूची हटाइएको छ। प्रधानमन्त्रीले सांसदसँग प्रत्यक्ष रुपमा प्रश्नोत्तर गर्ने कार्यक्रम तय भए पनि स्वास्थ्य अवस्थामा समस्या देखिएपछि उक्त कार्यसूची हटाइएको हो।

सभामुख देवराज घिमिरेको सचिवालयले प्रधानमन्त्री ओलीको अस्वस्थताका कारण प्रश्नोत्तर कार्यक्रम स्थगित गरिएको जानकारी दिएको छ।

प्रतिनिधिसभाको बैठक मंगलबार बिहान ११ बजे नयाँ बानेश्वरस्थित संसद् भवनमा सुरु भएको हो। बैठकमा अन्य निर्धारित कार्यसूची भने यथावत् रुपमा अघि बढाइने संसद् सचिवालयले जनाएको छ।

यसअघि तय भएको कार्यसूचीअनुसार पूर्वाधार विकास समितिका सभापति दीपकबहादुर सिंहले ‘पूर्वाधार विकास समितिको वार्षिक प्रतिवेदन, २०८१’ पेस गर्ने र भूमि व्यवस्था तथा गरिबी निवारणमन्त्री बलराम अधिकारीले ‘भूमिसम्बन्धी केही नेपाल ऐनलाई संशोधन गर्ने विधेयक, २०८२’ माथि विचार गरियोस् भन्ने प्रस्ताव प्रस्तुत गर्ने कार्यक्रम रहेको छ।